Шүүх эмнэлэг: Талийгаач охины 11 хавирга хоёр сарын өмнө хугарч байсан

Хууль зүйн сайд Х.Нямбаатар гэр бүлийн хүчирхийллийн улмаас харамсалтайгаар амиа алдсан есөн настай охины талаар мэдээлэл өглөө. 

Хууль зүйн сайд Х.Нямбаатар : Энэ хэрэг БЗД-ийн 23 дугаар хороонд үйлдэгдсэн. Өглөө найман цагийн үед энэ хэрэг үйлдэгдсэн гэдэг нь эхний урьдчилсан шалгалтаар тогтоогдсон. Хэрэг гарах үед охины ээж гэртээ унтаж байсан учраас хараагүй гэсэн мэдүүлгийг өгсөн гэдгийг албаныхан надад мэдээлсэн.  Хэрэг үйлдсэн этгээд "би нэг удаа гэдэс рүү нь өшиглөсөн" гэх мэдүүлгийг өгсөн. Одоо энэхүү хэрэг харъяалалын дагуу Нийслэлийн цагдаагийн газарт шалгагдаад явж байна. Хамгийн ноцтой мэдээлэл нь  “Шүүх эмнэлгийн эхний үр дүнгээр талийгаачийн хавирга хоёр талдаа буюу нэг талдаа таван хавирга, нөгөө талдаа зургаан хавирга нийтдээ 11 хавирга хоёр сарын өмнө ташраараа хугарч байсан гэсэн шинжилгээний хариу гарсан”. Энэ нь охин өмнө нь хүчирхийлэлд удаа дараа өртөж байсан нь харагдаж байна. Тухайн нийтийн байрных нь хүмүүс хэрэг үйлдсэн этгээдийг хүчирхийлэл үйлддэг байсныг мэддэг байсан ч цагдаад дуудлага өгөөгүй.