Гэр бүлийн хүчирхийлэл үйлдэгчдийн 98 хувь нь хэрэг хүлээх чадвартай, эрүүл гэсэн дүгнэлт гардаг байна

Жилд дунджаар албан ёсоор гэр бүлээ батлуулсан 4000-5000 гэр бүл гэрлэлтээ цуцлуулж байна. Энэ бол хуулийн дагуу гэр бүлээ батлуулсан иргэдийн тоо юм. Монгол улсад 12 төрлийн хэв шинж бүхий гэр бүл амьдарч байна. Эдгээр хэв шинжийн дотор дахин гэр бүл бологсод ч мөн багтаж байгаа юм. Харамсалтай нь дахин гэр бүл зохиосон эцэг, эхийнхээ хохирогч болж бие, сэтгэлийн хохирол амсаад зогсохгүй амь насаа алдаж байгаа хүүхдүүдийн тоо нэмэгдсээр байна. Үүний нэг жишээ болж 9-хөн настай бяцхан охин хойд эцгийнхээ гарт амиа алдсан байж болзошгүй хэрэг олон нийтийг цочирдуулж байна. Талийгаач охин биедээ олон тооны гэмтэлтэй байсныг урьдчилсан байдлаар тогтоосон бол амь насаа алдах хүртэл эрсдэлтэй нөхцөлд байсныг нь хэн ч мэдээгүй гэдэгт олон нийт шүүмжлэлтэй хандаж байгаа юм. Өнөөдөр ГБХЗХГ-аас мэдээлэл хийлээ. Ингэхдээ анхан шатны нэгж болох хамтарсан баг үүнд хариуцлагатай хандаж, эргүүлийн цагдаа тухайн дуудлагаар очсон бол хорооны нийгмийн ажилтанд мэдэгдэх ёстой байсан. Төрийн байгууллагуудын уялдаа холбоо байхгүйгээс ийм нөхцөл бүрдсэн байж болох юм гэсэн мэдээллийг өгсөн юм.