С.Насанбат: ОХУ-аас Сэлэнгэ аймагт ирсэн жолоочийн сорьцыг манай аймагт шинжлэн үзэхэд хариу нь эерэг гарсан

Манай улсад коронавирусийн халдварын нэг тохиолдол илэрч нийт батлагдсан тохиолдол 312 болсон талаар ЭМЯ өөрийн цахим хуудаснаа нийтэлжээ. Тодруулбал ХӨСҮТ-ийн Вирус судлалын лаборатори, Дархан-Уул аймгийн вирус судлалын салбар лабораторит нийт 401 сорьцод шинжилгээ хийхэд нэг хүний хариу эерэг гарсан байна. Энэ талаар бид ХӨСҮТ-ийн захирал Д.Нямхүүгээс тодруулахад коронавирусийн 312 дахь тохиолдол ОХУ-аас ирсэн ачаа тээврийн жолооч, бид маргааш /2020.09.21/ нэгтгэн мэдээлэл өгнө гэлээ.

Мөн энэ асуудлаар бид Дархан-Уул аймгийн Засаг дарга С.Насанбатаас тодруулахад: Өчигдөр /2020.09.19/ ОХУ-аас Сэлэнгэ аймагт ирсэн ачаа тээврийн жолоочийг сэжигтэй тохиолдол гэж үзэн Сэлэнгэ аймгаас манай Дархан-Уул аймгийн вирус судлалын  лаборатори луу шинжилгээний сорьцыг явуулж шинжлэн үзэхэд коронавирусийн халдвартай буюу эерэг гарсан. Тухайн хүн нь ОХУ-ын иргэн бөгөөд өчигдөр /2020.09.19/ ирэнгүүт нь шинжилгээнд хамруулсан. Одоогоор Сэлэнгэ аймагт тусгаарлалтад байгаа гэх мэдээллийг өглөө.