Улсын аварга П.Бүрэнтөгс: Допингийн шинжилгээний хариуг надад хэлээгүй байна

Тулгар төрийн 2229, Их Монгол Улсын 814, Ардын хувьсгалын 99 жилийн ой, Үндэсний их баяр наадмын хүчит бөхийн барилдааны бөхчүүдээс допинг илэрсэн гэх мэдээлэл байна. Тодруулбал, энэ жилийн наадмын үзүүр бөх Н.Батсуурь, Р.Пүрэвдагва нараас допинг илэрсэн байж болзошгүй талаар эх сурвалжууд мэдээллээ. Допинг илэрсэн гэх нэг бөхийн нэр тодорхойгүй байна. 

  Өнгөрсөн жилийн баяр наадмаар тавын даваанаас хойш давсан 16 бөхөөс допингийн шинжилгээ авч, Тус шинжилгээний хариу өнөөдөр БНСУ-аас иржээ. Эх сурвалжийн мэдээлж буйгаар том цолтой гурван бөхөөс допинг  илэрсэн гэх мэдээллийг өгч байгаа юм. Яг одоо Хуульзүй, дотоод хэргийн яаманд нэр бүхий бөхчүүдийг дуудаж, шинжилгээний хариуг танилцуулж байгаа аж. Энэ талаар Монголын бөхийн холбооны тэргүүн Ц.Магалжаваас тодруулахад уржигдар шинжилгээний хариу ирсэн, хэн хэн гэдгийг нь Баяр наадмыг зохион байгуулах комиссоос удахгүй зарлана гэв.

Харин энэ жилийн наадамд түрүүлсэн Улсын аварга П.Бүрэнтөгс өөрийн фэйсбүүк хуудсаар дамжуулан уг асуудалтай холбоотойгоор мэдээлэл хийлээ. Тэрээр “Үзүүр түрүүний бөхөөс допинг илэрсэн гэсэн учир нь олдохгүй буруу ташаа мэдээлэл тархаад байна. Учрыг нь олоогүй байж худал мэдээлэл тархаагаад байгаа хүмүүсийг хувьдаа гайхаж байна. Одоогоор Допингийн эсрэг үндэсний төвөөс шинжилгээний хариу ирсэн талаар надад ямар нэгэн хариу хэлээгүй. Ийм юмыг надаас түрүүлээд сайтууд мэдчихдэг юм болов уу гээд гайхаад сууж байна. Хариу ирсэн бол удахгүй надад мэдэгдэх байх. Тэр үед би та бүхэнд мэдэгдэх болно. Надад нууж хаах юм байхгүй. Тийм болохоор та бүхэн худал мэдээлэлд битгий итгээрэй” гэсэн юм.