Европт диско бар, шөнийн клубүүдийг хааж эхэлжээ

Европт корона вирус залуусын дунд эрчимтэй тархаж эхэлсэнтэй холбогдуулан эрх баригчид залуус олноор ордог баар, диско, шоу цэнгээнүүдийг олноор нь хааж эхэлсэн байна. Энэ оны хоёрдугаар сард 15-24 насныхан халдвар авагсдын 4,5 хувийг эзэлж байсан бол зургаадугаар сар гэхэд 15 хувийг эзлэх болж нэмэгдсэн тухай ДЭМБ мэдээлсэн. Иймд нийгмийн зай барих боломж байдаггүй шөнийн клубүүд, диско бааруудыг ахин хааж эхэлжээ. Жишээлэхэд, Италид бүр ч хатуу арга хэмжээ авч ил задгай газар ч олноор цуглаж бүжиглэхийг хориглосон. Европчууд олноор очиж амардаг Мальтад шөнийн клуб, бааруудыг хаасан төдийгүй нэг дор 15-аас олноор цуглахыг хориглосон байна. Харин Туркийн Антальяд хөөст үдэшлэг зохиохыг хориглосон ч диско бааруудыг хараахан хаагаагүй ч үйлчлүүлэгчид заавал амны хаалт зүүхийг шаардаж эхэлсэн. Германы шөнийн клубүүдийн менежерүүдийн холбоо “Clubcomission” нь диско бааруудыг нээтэл нэлээд удах тухайгаа мэдээлсэн.