Казахстаны төрийн албан хаагчдыг гадаадад банкны данстай байхыг хоригложээ

Казахстан улсын засгийн газар тус улсын төрийн албан хаагчид болон тэдний гэр бүлийн гишүүд гадаад улс орнуудад банкны данстай байхыг хориглож байгаагаа зарлажээ.

Сүүлийн үед албан тушаалтнуудын офшор данстай холбоотой дуулиан хэд хэдэн удаа дэгдсэн нь ийм арга хэмжээ авахад хүргэсэн байна.

Казахстаны сангийн сайд Ерулан Жамаубаев уг арга хэмжээ нь сүүдрийн эдийн засагтай тэмцэх, санхүүгийн хяналт зохицуулалтыг сайжруулах хөтөлбөрийнх нь нэг хэсэг болохыг өчигдөр тайлбарласан юм.

Түүний мэдэгдлээс нэг өдрийн өмнө буюу есдүгээр сарын 1-ний өдөр Казахстаны ерөнхийлөгч Касым-Жомарт Токаев ард түмэндээ хандаж үг хэлэхдээ авлигатай тэмцэхийн тулд 2021 оноос эхлэн төрийн албан тушаалтнуудын гадаад дахь банкны дансыг хориглох шаардлагатай байгааг онцолж байв.

Зөвлөлтийн бүрэлдэхүүнээс гарсан улс орнуудын дотроос эдийн засгийн шинэчлэлтээрээ тодорч байсан Казахстанд сүүлийн жилүүдэд авлига, албан тушаалын гэмт хэрэг гарах нь нэмэгдсэн юм.

Шинэ хориг нь хэзээнээс мөрдөгдөж эхлэх, хэрвээ зөрчсөн тохиолдолд ямар арга хэмжээ авах талаар Жамаубаев сайд мэдээлэл өгөөгүй байна.