Оросууд Америкийг устгах чадвартай зэвсэг турших мөнгийг луйварджээ

ОХУ-ын Батлан хамгаалах яам “Сармат” гэж нэрлэгдсэн тив алгасагч баллистик пуужинг төлөвлөж байснаараа 2021 онд зэвсэглэлдээ авч чадахгүй болж магадгүй болсон тухай Оросын “Военно-промышленныйкурьер” /Цэргийн аж үйлдвэрлэлийн элч/ сонин мэдээлсэн байна. Сармат пуужинг зэвсэглэлд авахаас өмнө туршин харвах ёстой ч маш чухал ийм туршилт хийхэд мөнгө хүрэлцэхгүй болсон тухай тус сонинд мэдээлжээ. “Сармат” пуужинг харван туршихад зориулсан 3,2 тэрбум рублээс 1 тэрбум гаруйг нь Батлан хамгаалах яамтай гэрээ байгуулсан туслан гүйцэтгэгч компани хуурамч дансаар авч, бэлэн мөнгө болгож авсан тухай Оросын Ерөнхий прокурорын албанаас мэдээлсэн юм байна.

Оросын цэргийн шинжээч А. Леонков нь АНУ-ыг устгахад ердөө 10 ширхэг “Сармат” пуужин хангалттай гэж 2019 онд мэдэгдэж байжээ. Ганц ширхэг “Сармат” нь 7,5 цөмийн мегатонн хүчтэй цөмийн хошуу тээх чадвартай нь АНУ-ын хүн ам олноор оршин суудаг нутагт тусвал 37 сая хүний аминд хүрэх чадвартай юм байна. Энэ пуужин нь Өмнөд туйлаар дамжсан тусгай баллистик замаар нисэж, пуужингаас хамгаалах хэрэгсэл огт байхгүй талаас нь АНУ-ын нутагт хүрэх чадвартай, бага өндөрт маневр хийх чадвартай гэж мэдэгдэж байжээ.