“Facebook”, “Amazon”, “Twitter”, “Google” компаниуд олон нийтийн сүлжээг зохицуулах шинэ санаачилгыг эсэргүүцэв

“Facebook”, “Amazon”, “Twitter”,“Google” компаниуд нь АНУ-ын Харилцаа холбоо хариуцсан холбооны комисст хандан Америкийн Ерөнхийлөгчийн захиргаанаас гаргасан олон нийтийн сүлжээний үйл ажиллагааг зохицуулах тухай санаачилгыг хүлээж авахгүй байхыг уриалсан тухай “Reuters” агентлаг мэдээлж байна.

Мэдээлэл, технологийн салбарын дэлхийн хамгийн том энэ дөрвөн компани нь Ерөнхийлөгч Трампын гаргасан олон нийтийн сүлжээний үйл ажиллагааг хязгаарлах, хянах тухай санаачилга нь хууль зүйн үүднээс ямар ч үндэслэлгүй, зөвхөн хувийн үзэл бодол дээр үндэслэгдсэн тул комиссын төөрөгдөлд оруулж магадгүй гэж анхааруулжээ. Олон нийтийн сүлжээг хянах шинэ дүрэм баталбал интернэт дэх луйварчид, залилан мэхлэх янз бүрийн сүлжээ зэрэг зүйлстэй тэмцэх эрх зүйн боломжгүй болно гэдгийг мөн онцолсон байна.

Өнгөрсөн тавдугаар сард “Twitter” дээрх Трампыг жиргээнд тус компанийн удирдлагын зүгээс худал байж болох мэдээлэл тул давхар шалгаж, лавлах ёстой гэсэн тусгай тэмдэглэл хийсний дараа Трамп маш ихээр уурласан. Тэрээр олон нийтийн сүлжээнүүдийг дураараа дургиж байна гэж шүүмжлээд АНУ –ын нутаг дэвсгэр дээр үйл ажиллагаа явуулж байгаа “Facebook”, “Twitter” гэх мэт олон нийтийн сүлжээний үйл ажиллагааг зохицуулах тухай шийдвэрт гарын үсэг зурж байсан юм.