Танилц: Хөөн хэлэлцэх хугацаа нь дууссан ХЭРГҮҮД

МХЕГ-ын газрын дарга Э.Аззаяа болон оймсондоо боодол мөнгөтэй баригдсан Б.Баярсайхан нарын авлигын хэрэг,

Мэргэжлийн хяналтын ерөнхий газрын Экспорт, Импорт, Хилийн хорио цээрийн хяналтын дарга асан Н.Баярсайханы албан өрөөнд АТГ-аас гэнэтийн шалгалт хийхэд их хэмжээний мөнгө гарсан бичлэг олон нийтэд ил болсон. Бичлэгт гарсанчлан тэрээр боодол ам.долларыг оймсондоо нуусныг мөрдөгч нар илрүүлсэн. Тэгвэл тэрбумаар хэмжигдэх авлигын хэргээр шалгагдаж байсан мэргэжлийн хяналтын байцаагч Б.Баярсайхан, Э.Аззаяа нарын 25 хүнд холбогдох хэргийн хөөн хэлэлцэх хугацаа дуусч, хэргээс мултарсан. 

Нийгмийн даатгалын хэлтсийн албан тушаалтнууд нас барагсадын нэр дээр мөнгө завшиж улсад ЗУРГААН тэрбум төгрөгийн хохирол учруулсан хэрэг,

 Нийгмийн даатгалын ажилтнууд нас барсан иргэдийн нэрээр улсаас их хэмжээний мөнгө авч байсан хэргийг Эрүүгийн цагдаагийн газрын Эдийн засгийн гэмт хэрэгтэй тэмцэх хэлтэс 2015 оноос хойш шалгаад байсан.  Улсыг 6 тэрбум төгрөгөөр хохироосон гэх энэ хэрэгт гол буруутан нь олдсонгүй, хохирогч гэж хүн гарч ирсэнгүй байсаар хэрэг хяналтын шатандаа хаагдаж, бүр хэрэгсэхгүй болсон. 

ҮАБЗ-ийн нарийн бичгийн дарга А.Гансүх Монголын төмөр зам компанийн хөрөнгийг завшсан гэх хэрэг,

ҮАБЗ-ийн нарийн бичгийн даргаар ажиллаж байсан А.Гансүх ЗТЯ-ны Төрийн нарийн бичгийн даргаар ажиллаж байсан Б.Батзаяа, “Монголын төмөр зам” компанийн гүйцэтгэх захирал асан П.Бат-Эрдэнэ, тус компанийн хэлтсийн дарга А.Зориг, “Либерти партнерс” ХХК-ийн захирал Ч.Ганбат тэргүүтэй хүмүүсийг 2015 оноос сүр дуулиантай шалгаж эхэлсэн.  Гэвч хэргийг шалгах процесс сунжирсаар хаагдсан.

“Жаст” компанийн захирал Ш.Батхүү “Эрдэнэт” үйлдвэрийг барьцаанд тавьж “Стандарт” банкнаас 109 сая долларын зээл авсан гэх хэрэг,

2010-2012 онд “Эрдэнэт” үйлдвэрийн 51 хувийг гаднын банкны барьцаанд тавьж, Өмнөд Африкийн “Стандарт” банкнаас 109 сая долларын зээл авсан хэргээр “Жаст”-ын Ш.Батхүүг яллагдагчаар татан шалгаж байгаад хөөн хэлэлцэх хугацаа дууссан. 

Эдийн засгийн хөгжлийн сайд асан Н.Батбаяр, УИХ-ын гишүүн асан Б.Гарамгайбаатар нар Самурай бондын олголт зарцуулалтад эрх мэдлээ хэтрүүлсэн хэрэг,

Холбогдох эрүүгийн хэргийг 2018 оны есдүгээр сард шүүхэд шилжүүлэх саналтайгаар шилжүүлсэн ч хөөн хэлэлцэх хугацаа дууссан үндэслэлээр хэрэгсэхгүй болгожээ.

Хууль зүйн сайд асан Д.Дорлигжав “Алтан дорнод монгол” компаниас 4 сая ам.долларыг хахуульд авсан гэх хэрэг,

Д.Дорлигжав өөрийн дүү Д.Баатарын компаниар дамжуулан “Алтан дорнод монгол” компанийн дэд захирал Ч.Бямбаагаар зуучлуулан 4 сая ам.долларыг хахуульд авсан гэх хэрэгт татагдан шалгагдсан. Улмаар хэрэг хөөн хэлэлцэх хугацаа дууссан үндэслэлээр хэрэгсэхгүй болгожээ.

 ЗГХЭГ-ын дэд дарга асан Г.Дэнзэн албан тушаалаа ашиглан “Эрдэнэс Таван толгой” компаниас тендер авсан гэх хэрэг,

Шүүхээс Ерөнхий сайд асан Н.Алтанхуягийн хүргэн Г.Дэнзэнг буруутай гэж үзсэн ч хэрэг нь хөөн хэлэлцэх хугацаагаар хаагдлаа. Г.Дэнзэнд холбогдох хэргийг өнгөрсөн сарын 1-нд шүүх хянасан ч хэргийн хөөн хэлэлцэх хугацаа дууссан тул түүнийг эрүүгийн хариуцлагаас чөлөөлж шийдвэрлэсэн юм. 

Зам тээврийн яамны газрын дарга Р.Онон үндэслэлгүйгээр хөрөнгөжсөн гэх хэрэг,

Зам тээврийн яамны газрын дарга Р.Ононд холбогдох хэрэг Эрүүгийн хуульд заасан хөөн хэлэлцэх хугацаа дууссан үндэслэлээр хэрэгсэхгүй болгосон.

Хотын дарга асан Э.Бат-Үүл, түүний хүү Б.Чулуудай нар гэр хорооллыг орон сууцжуулах төслийг тендергүйгээр авсан гэх хэрэг,

Э.Бат-Үүлийн хүү Б.Чулуудайгийн захирлаар нь ажиллаж байсан “Гранд лайн” компани Баянзүрх дүүргийн Амгалан орчмын хэсэгчилсэн ерөнхий төлөвлөгөөний дагуу гэр хорооллын дахин төлөвлөлтийн төсөл хэрэгжүүлэх болж, “Улаанбаатар” банкнаас 3.3 тэрбум, Туркийн “216 Япи Үрэти Худалдаа” компаниас 1.2 тэрбум төгрөгийн зээл авсан байдаг.