Израйл нь Сирийн нийслэлийн орчим пуужингийн цохилт өгчээ

Израйлын нисэх хүчин Сирийн нийслэл Дамаскаас өмнөд зүгт орших Засгийн газрын цэргийн ангиудын байрлалд агаараас пуужингаар харваж халдлага үйлдсэн байна. Сирийн “SANA” агентлагийн мэдээлснээр Израйлын мэдэлд байдаг Голаны өндөрлөгөөс дайралт хийсний дараа Сирийн армийн хоёр цэрэг алагдаж, долоо нь шархадсан аж.

“Al Hadath” сувгийн мэдээлснээр Израйлын нисэх хүчин Дамаск хотын нисэх буудлын орчим байрласан Иранаас дэмжлэг авдаг шиит бүлэглэлүүдийг зэвсгийн агуулах руу пуужингаар харвасан юм байна.

Израйлын нисэх онгоцнууд хүссэн үедээ Сирийн нийслэл Дамаскийн орчим агаараас цохилт өгч, өдий төдий хохирол учруулж байгаад олон хүн гайхдаг. Оросын С-300 гэх мэт агаарын дайралтаас хамгаалах сүүлийн үеийн зэвсэгтэй атлаа ийм дайралтыг няцааж чадахгүй байна гэж шүүмжилдэг. Гэтэл Израйл 1967 оны Зургаан өдрийн дайны үеэр эзэлсэн Голаны уулс буюу Голаны өндөрлөгөөс нийслэл Дамаск хүртэл ердөө 60 км-ийн зайтай байдаг юм байна. Үүнийг Израйл нь чадварлагаар ашиглан шаардлага гарвал Сирийн агаарын орон зай руу нэвтрэлгүйгээр пуужингаар харвадаг эсвэл Ливаны агаарын орон зайд нэвтэрч тэндээс дайрдаг юм байна. Орчин үед “агаар- газар” ангиллын пуужинд 60 км-ийн алслал асуудал биш байдаг аж.