Т.Мөнхсайхан: Хөнгөлттэй нөхцлөөр олгодог эмийн жагсаалтыг тэлэхгүй, хумина

Эрүүл мэндийн салбарт хийгдсэн хуулийн нэмэлт өөрчлөлтүүдийн талаар Эрүүл мэндийн сайд Т.Мөнхсайхан мэдээлэл хийлээ.

Энэ удаагийн УИХ-ын ээлжит бус чуулганаар төсвийн тодотголын тухай хуулийг нэмж эрүүл мэндийн салбарын чухал хуулиудын өөрчлөлтийг Эрүүл мэндийн яам Сангийн яамтай ярилцаж ЗГ-ын зүгээс оруулаад байна
Үүнд хамгийн гол нь эрүүл мэндийн байгууллагуудын санхүүжилтийн тогтолцоонд өөрчлөлт оруулах, нэг худалдан авагчийн тогтолцоо буюу стратегийн худалдан авалтыг хийхэд шаардлагатай “Эрүүл мэндийн тухай хууль”, “Эрүүл мэндийн даатгалын тухай хууль”, “Эмнэлгийн тусламжийн тухай” хуулиудад орох шаардлагатай өөрчлөлтүүдийг орууллаа
Ингэснээр цаашдаа эрүүл мэндийн салбарт зөв санхүүжилтийг хийх, эрүүл мэндийн байгууллагууд өөрсдийн хийж гүйцэтгэсэн хэмжээгээр цалин урамшуулал авдаг болох, үүнийг дагаад эмнэлгийн тусламж үйлчилгээ сайжрахад нөлөөлөхүйц томоохон өөрчлөлтийг хийлээ.
Цаашдаа энэ өөрчлөлтийг дагасан үйл ажиллагааны хөтөлбөрт нэлээд анхаарал хандуулж ажиллах шаардлага үүсч байна.
Тухайлбал 11 сараас эхлэн хэрэгжиж эхлэх “Хөнгөлөлттэй эмийг олгох” хуулийн өөрчлөлт хийгдлээ. Үүн дээр бид бүхэн хөнгөлөлттэй эмийг төвөг чирэгдэл багатайгаар бүх шатлалын эмнэлгийн эмч нар бичдэг, бүх эмийн сангуудаар олгох боломжийг бүрдүүллээ. Ингэснээр цаашдаа журмаараа тодорхой зохицуулалтуудыг хийж ард иргэдэд үүсдэг чирэгдэлийг багасгах тал дээр нэлээдгүй ажил хийхээр төлөвлөн ажиллаж байна. Бусад хуулийн өөрчлөлтүүд 2021 оны 1 сарын 1-нээс хэрэгжинэ. Ингэснээр санхүүжилтийн зөв тогтолцоо бий болж тусламж үйлчилгээний чанар хүртээмж мэдэгдэхүйц сайжрах өөрчлөлтүүдийг оруулсан гэлээ.