Кембрижийн хөтөлбөрийг хэрэгжүүлэх лобби бүлэг УИХ дотор байгуулагдлаа

Кембрижийн хөтөлбөрийг хэрэгжүүлэх, үйл ажиллагааг дэмжих лобби бүлэг УИХ-д байгуулагдлаа. Энэ лобби бүлэгт УИХ-ын гишүүн Н.Учрал, Г.Дамдинням, Г.Амартүвшин, Х.Ганхуяг, Х.Булгантуяа, Сү.Батболд нар нэгджээ.

Олон улсад хүлээн зөвшөөрөгдсөн ерөнхий боловсролын хөтөлбөр болох Кембрижийн хөтөлбөрийг Монгол улсад анх 2010 онд хэрэгжүүлэх чиглэлээр Англи Монголын ЗГ-ын хооронд гэрээ хэлцэл байгуулагдсан аж. Уг гэрээнд зааснаар 2019 он гэхэд нийт 30 сургуулийг уг хөтөлбөрт шилжүүлнэ, 3 сургуульд лаборатори хэлбэрээр үйл ажиллагааг туршиж багш нарыг чадавхижуулах болон улсын хэмжээнд англи хэлний чадавхийг бэхжүүлэх ажлыг зохион байгуулна гэсэн төлөвлөгөөтэй байжээ. Гэвч өнөөдөр уг төлөвлөгөө биелээгүйгээр зогсохгүй хүүхдүүдийн дунд боловсролын ялгаа бий болгосон байна. Тодруулбал, 2012 онд энэ хөтөлбөр үндэсний цөм хөтөлбөр гэдэг нэртэй болсон. Ингэснээр лаборатори сургууль гэдэг ойлголт гарч ирсэн юм. Нэг ёсондоо сурагчдыг ялгаварлаж эхэлсэн. Энгийн ба кембрижийн сургуулийн хүүхдүүд гээд ялгаа гардаг болсон нь гол асуудал юм. Иймд Монголын бүх ЕБС-иудад олон улсад хүлээн зөвшөөрөгдсөн Кембрижийн хөтөлбөрийг хэрэгжүүлж, боловсролын ялгааг арилгахын тулд уг лобби бүлэг ажиллана гэдгээ мэдэгдлээ.