Венесуэлийн Ерөнхийлөгч сөрөг хүчний удирдагчийг баривчлахад бэлэн гэв

Венесуэлийн Ерөнхийлөгч Николас Мадуро нь шүүх ба прокурорын газраас зохих шийдвэр гаргасан нөхцөлд сөрөг хүчний удирдагч Хуан Гуйдог баривчлахад бэлэн гэжээ.

Тэрээр ням гарагт улсын мэдлийн телевизээр ярилцлага өгөхдөө “Шүүх ба прокурорын газраас түүнийг баривчлах тогтоол гаргасан өдөр гүйцэтгэхэд гар чичрэхгүй” гэж мэдэгджээ. Мөн Венесуэлийн хүн амын 84 хувь нь сөрөг хүчний удирдагч Хуан Гуайдог нь дэмжихгүй байгаа гэдгийг онцолсон байна.

Венесуэлийн парламентад дийлэнх олох болсон сөрөг хүчин Гуайдог парламентын спикерээр томилсны дараа 2019 оны нэгдүгээр сард Венесуэлийн Дээд шүүхээс томилгоог хүчингүй болгосон. Үүний дараа Гуайдо нь өөрийгөө Ерөнхийлөгчийн үүрэг гүйцэтгэгчээр томилж, шинэ Засгийн газар байгуулсан. АНУ, Европын холбоо, Америк тивийн улсуудын байгууллага, Лимын бүлэг зэрэг олон улсын байгууллага, улс орнууд түүнийг Венесуэлийн Ерөнхийлөгч гэж хүлээн зөвшөөрч, Мадурогийн Засгийн газартай бүх холбоогоо тасалсан. Зарим улс дах Венесуэлийн элчин сайдын яамны байшин барилгын Хуайн Гуайдогийн талынхан дайран эзэлж, түүнийг тухайн улсуудын хууль сахиулах байгууллагууд хориглоогүй байдаг.

Мадурог Венесуэлийн Ерөнхийлөгч гэдгийг ОХУ, БНХАУ, Беларус, Иран, Куба, Никарагуа, Сири, Турк улсууд хүлээн зөвшөөрсөн хэвээр байгаа юм.