Сэтгүүлчийг хөнөөсөн этгээдэд 50 жил хорих ял оноожээ

Мексикийн шүүхээс наймдугаар сарын 22-нл сэтгүүлч Мирослава Бричийн амийг хөнөөсөн хэрэгт сэжиглэгдэж байсан Эль Ларри хочтой Хуан Карлос Моренод 50 жил хорих ял оноосон тухай “Deutsche welle” мэдээлсэн байна. Гэмт этгээд нь сэтгүүлчийг удаан хугацааны турш айлган сүрдүүлж байгаад санаатайгаар амийг нь хөнөөсөн гэж шүүхээс үзсэн байна.

 Хуан Карлос Мореног нь Мексиктээ томоохонд тооцогддог хар тамхины нэгэн мафийн толгойлогч гэж үздэг. Прокурорын газраас түүнд 70 жил хорих ял оноохыг шаардсан ч шүүх ийнхүү “энэрэнгүй зан” гаргасан бололтой.

 Мирослава Брич нь хар тамхины хууль бус наймаа болон орон нутгийн удирдлагууд хар тамхины мафитай сүлбэлдэн асар их авлига авч байгааг илчилсэн материал бичдэг, энэ асуудалд эрх баригчид нухацтай хандахыг шаарддаг сэтгүүлч байжээ. Түүнийг 2017 оны гуравдугаар сард төрөлх Чиуауа хотод, гэрийнхээ гадаа машинд сууж байхад нь найман удаа буудаж алсан байдаг. Гэмт этгээдийг дайрах үеэр машинд хүүхэд нь сууж явсан ч золоор суманд өртөөгүй аж. Гэмт хэргийн газар Хуан Карлос нь “Дэндүү чанга ярьсных нь төлөө” гэсэн зурвас үлдээгээд явсан байжээ.