Х.Нямбаатар: Ломбардыг бүртгэлжүүлж, өдрийн зээлийг хязгаарлана

Хууль зүй, дотоод хэргийн сайд Х.Нямбаатар эдийн засгийн өсөлтийг дэмжсэн эрх зүйн орчинг бүрдүүлж, хууль эрх зүйн салбар дахь цахим шилжилтийг эхлүүлэх, хууль зүйн салбарын ирэх дөрвөн жилийн бодлогын  талаар мэдээлэл хийж байна.

Тэрбээр "Монгол Улсын Засгийн газрын үйл ажиллагааны мөрийн хөтөлбөр үндсэндээ дуусаж, УИХ-аар хэлэлцэхээр өргөн барьсан. Дөрвөн жилийн хугацаанд хэрэгжүүлэх ажлаа гурван бодлогын баримт, бичигт тусгасан. Эдийн өсөлтийг дэмжсэн эрх зүйн орчныг бүрдүүлэх уриатай шүүх, эрүүгийн хэрэг, хувийн эрх зүйн шинэтгэл болон бусад гэсэн шинэчлэлийг хийнэ" гэв.

Түүнчлэн "Өдрийн зээлийг хориглож, бүх ломбардыг бүртгэлжүүлнэ. Ингэснээр үйл ажиллагаа эрхлэх эрх зүйн орчин бүрдэнэ. Мөнгөний эх үүсвэрийг нь тодорхой болгоно. Олон улсын жишиг нь бүх мөнгө, санхүүгийн үйл ажиллагаа явуулдаг газар нь заавал бүртгэлтэй байхыг шаарддаг. Манайх шиг задгай газар байхгүй. Санхүүгийн задгай, түүнд дөрөөлсөн зээл олгох, иргэд хохирох орчныг бүрдүүлээд байна, бид. Тиймээс энэ бүхнийг цэгцэлж, эрх зүйн орчныг бүрдүүлнэ" гэж ярилаа.