Америкийн “Lockheed Martin” 400 ширхэг F-16 сөнөөгч онгоц экспортолно

АНУ нь холбоотон улс орнууддаа нийт 62 тэрбум долларын F-16 сөнөөгч онгоц худалдахыг зөвшөөрсөн тухай Пентагон нь наймдугаар сарын 14-нд гаргасан мэдэгдэлдээ дурджээ. Эдгээрээс 90 ширхэг F-16 сөнөөгчийг нэрийг нь хэлээгүй улсууд руу нийлүүлээд байгаа аж. Хэдийгээр нэрийг нь дурдаагүй ч эдгээрээс 66 сөнөөгчийг Тайванд нийлүүлсэн гэдэгт шинжээчид итгэлтэй байгаа юм байна.

Тайванд энэ сөнөөгчийг зарах зөвшөөрлийг бүр 1992 онд өгөөд байсан ч тухайн үедээ АНУ нь БНХАУ-тай тогтоосон найрсаг харилцаагаа эвдэхийг хүсээгүй тул нийлүүлэлт хийхээс татгалзаад байсан юм. Улмаар шинэ сөнөөгч онгоц нийлүүлэхийн оронд Тайваны зэвсэглэлд байсан онгоцнуудыг сайжруулан шинэчлэх санал тавьж байв.

Гэвч Трамп Ерөнхийлөгчөөр сонгогдсоны дараа байдал эрс өөрчлөгдсөн. Трамп нь Хятадыг АНУ-ын геолполитикийн гол өрсөлдөгч гэж зарлан, Хятадыг тогтоон барих, нөлөөг нь багасгах арга хэмжээг эрчимтэй авч эхэлсэн юм. Энэ арга хэмжээний хүрээнд Тайванд 66 ширхэг F-16 Viper сөнөөгч онгоц зарахаар болсон. БНХАУ нь уламжлал ёсоор Тайванд байлдааны зэвсэг, техник нийлүүлэхийг эрс эсэргүүцэж, сөнөөгч онгоц нийлүүлэх нь БНХАУ-ын зүгээс зайлшгүй хариу өгөх ёстой болох улаан шугамыг давсан хэрэг болно гэж анхааруулсан.

F-16 сөнөөгчийн хамгийн сүүлийн боловсронгуй хувилбар болох F-16 Viper-ийг АНУ 2015 онд туршин зэвсэглэлдээ авсан. Шинэ сөнөөгч нь орчин үеийн AESA радарын системтэй, мэдрэгч дэлгэц бүхий шинэ хянах самбар, нислэгийг удирдах шинэ системтэй, онгоцны удирдлагын копьютерийн системийг сайжруулж, радио локацийн тэмцэл хийх төхөөрөмж суурилуулсан гээд олон давуу талтай болсон юм байна.

Тус онгоцыг үйлдвэрлэдэг “Lockheed Martin” компани нь нийт 400 ширхэг F-16 сөнөөгчийг хилийн чанадад зарах төлөвлөгөөтэй байгаа аж.