Лукашенко Путинтай утсаар ярьж туслалцаа хүсжээ

Беларусын Ерөнхийлөгч Александр Лукашенко бямба гарагт ОХУ-ын Ерөнхийлөгч Владимир Путинтай утсаар ярьж, улсад нь үүсээд байгаа нөхцөл байдлын талаар санал бодлоо солилцсон байна. Үүний дараагаар Лукашенко нь Беларусын Батлан хамгаалах яамны Стратеги удирдлагын төвд зөвлөгөөн хийхдээ “Цэргийн оролцооны тухайд гэвэл манайх Холбооны улс ба Хамтын аюулгүй байдлын гэрээний хүрээнд ОХУ-тай гэрээ байгуулсан. Одоо болж байгаа зүйлс нь энэ гэрээний зүйлд тохирч байгаа юм. Манай эхний хүсэлтээр л Оросын зүгээс бүх талын тусламж үзүүлэхээр болсон” гэжээ.

Энэ зуур Ерөнхийлөгч Лукашенкогийн ойрын хүрээллийнхэн төр эргэсэн тохиолдолд Орост орогнох боломж, нөхцөлийн талаар нууцаар ярилцсан тухай “Bloomberg” агентлаг мэдээлж байна. Москвад энэ талаар хийгдэж байгаа хэлэлцээрийн талаар хангалттай мэдээлэл бүхий эх сурвалжууд нь “Bloomberg” агентлагт мэдээлсэн гэж байна.

Үүнээс гадна сонгуулийн дараа аюулгүй байдлын шалтгаанаар Литва улс руу гарсан Лукашенкогийн гол өрсөлдөгч Светлана Тихановская нь төрийн эрх мэдлийг шилжүүлэх авах удирдах зөвлөлийг бүрдүүлж эхэлсэн байна. Тихановскаягийн хэвлэлийн алба энэ талаар мэдэгдэл хийж “Энэ бол нийгмийн хамгийн нэр хүндтэй хүмүүсээс бүрдсэн өргөн хүрээтэй ажлын бүлэг бөгөөд төрийн эрх мэдлийг шилжүүлэн өгөх аюулгүй бөгөөд тогтвортой механизмуудыг хэлэлцэн боловсруулах зорилготой юм” гэжээ.

Товчхондоо Ерөнхийлөгч Лукашенко нь эрх мэдлээ алдахгүй эцсээ хүртэл зогсоно гэдэгтээ итгэлтэй байгаа бол сөрөг хүчнийхэн хэдийн ялсан гэж үзсэн бололтой төрийн эрх мэдлийг шилжүүлэн авах ажлыг эхлүүлжээ.