Польшид Америкийн цэргийн ангиуд тогтмол байршихаар боллоо

Польшид Америкийн 1000 цэргийн албан хаагчийг нэмж байршуулах тухай гэрээнд АНУ-ын Төрийн нарийн бичгийн дарга Майкл Помпео ба Польшийн Үндэсний батлан хамгаалахын сайд Мариуш Блашак нар гарын үсэг зурсан байна. Гэрээнд гарын үсэг зурах ёслолд оролцсон Польшийн Ерөнхийлөгч Анжей Дуда “Польш эсвэл АНУ-д аюул учирсан тохиолдолд манай цэргүүд мөр зэрэгцэн зогсоно гэдгийн баталгааг улам бэхжүүлсэн үйл явдал боллоо” гэжээ.

Одоогоор Польшид Америкийн 4500 цэргийн албан хаагч байгаа бөгөөд шинэ гэрээний дагуу үүн дээр АНУ-ын Форт-Нокст удирдлагатай Армийн тавдугаар корпуст багтдаг цэргийн ангиуд тогтмол сэлгээ хийн байрлаж байхаар боллоо.

Америкийн армийн нэг корпус нь хуяг танк, нисдэг тэрэг, их буу, тактикийн пуужингийн гээд нийт 3-5 дивизийн 45-60 мянган цэргийн албан хаагчтай, зэвсэглэлд нь 900 танк, тактикийн “Ланс” пуужин харвах 20 суурь, 203мм ба 155 мм-ийн 200 гаруй их буу, 300 миномёт, 200 нисдэг тэрэг, 300 гаруй зенитийн хэрэгсэл байдаг юм байна.