Оросын эрдэмтэд: COVID-19-ийн эсрэг дархлаатай болох хоёр л зам бий

Оросын сөрөг хүчнийг дэмждэг “Meduza” суваг нь Оросын 3000 гаруй эмчийг хамарсан асуулга явуулаад 23 нь ОХУ-д бүтээсэн вакцин хийлгэхгүй гэж мэдэгдсэн тухайгаа олон нийтэд мэдэгдсэн. Энэ мэдээлэл ихээхэн дуулиан тарьсан юм. Өрнөдийн судлаачид, мэргэжилтнүүд Оросын вакцинд итгэхгүй байх нэг хэрэг бол Оросын эмч нар ингэтэл их хувиар өөрийн судлаачдын вакцинд итгэхгүй байна гэдэг нэлээд том асуудал дагуулсан нь ойлгомжтой.

 Үүнтэй холбоотойгоор корона вирусийн эсрэг вакциныг боловсруулсан Гамайлейн нэрэмжит Тахал судлал ба микробиологийн Үндэсний судалгааны төвийн тэргүүн Александр Гинцбург тайлбар өгчээ. Тэрээр “Тэр татгалзаад байгаа эмч нарыг нэг харах юм сан. Энэ өвчнөөс зайлсхийх хоёр л боломж байдаг юм. Үүнд: хөнгөн хэлбэрээр өвдвөл урт хугацааны дархлаа үүсдэггүй тул хүнд хэлбэрээр өвдөх эсвэл вакцин хийлгэх. Хүнд хэлбэрээр өвдвөл насан туршдаа үр дагавар үлдэнэ гэсэн магадлал ихийн дээр заримдаа нас бардаг. Иймээс л вакцинаас татгалзаад энэ замаар явах эсвэл вакцин хийлгэх гэдгээс сонгох хэрэгтэй болж байгаа юм” гэжээ.

 Түүнчлэн Гинцбург нь Оросын вакцин нь бүх л шаардлагатай туршилтыг давж, бүх бичиг баримтыг ном ёсоор нь бүрдүүлсэн бөгөөд эмчийн бэлдмэлийн төвийн шалгалтыг давж гарч ирсэн гэдгийг онцлоод вакцины тухай нэмэлт мэдээллийг ойрын үед шинжлэх ухааны мэдээллийн хэрэгслүүд дээр нээлттэй байршуулна гэжээ. Мөн “Үүнээс бусад бүх зүйлс нь хуулийн хүрээнээс халиад пиар, зах зээлийн төлөөх өрсөлдөөн болж хувирч байгаа юм аа” гэжээ.