Байден хар арьст эмэгтэйг дэд Ерөнхийлөгчид нэр дэвшүүлжээ

АНУ-д ирэх арваннэгдүгээр сард явагдах Ерөнхийлөгчийн сонгуулиар Ардчилсан намаас нэр дэвших нь гарцаагүй гэгдэж байгаа Жо Байден сонгуульд хамтран зүтгэг дэд Ерөнхийлөгчийн албан тушаалд хар арьст эмэгтэйг нэр дэвшүүлсэн байна.

Тэрээр Калифорни мужаас Сенатад сонгогдсон Камала Харрисыг дэд Ерөнхийлөгчид нэр дэвшүүлсэн байна. Ингэснээр хэрэв Байден арваннэгдүгээр сарын 3-нд болох сонгуулиар ялбал өдгөө 55 настай Камала Харрис нь Америкийн түүхэн дэх анхны хар арьст дэд Ерөнхийлөгч болно.

Камала Харрис нь АНУ-ын Сенатад сонгогдохоос өмнө Калифорни мужийн Ерөнхий прокуророор ажиллаж байжээ. Тэрээр мөн Ардчилсан намаас Ерөнхийлөгчид нэр дэвшигчийг тодруулах анхан шатны сунгаанд нэр дэвшин өрсөлдөж байсан ч олонхын дэмжлэг авч чадалгүй ялагдал хүлээж байжээ. Гэхдээ тухайн үедээ Жо Байдены маш хатуу ширүүнээр шүүмжилж, олны анхаарлыг татаж байсан юм.

Ийнхүү Камала Харрисыг дэд Ерөнхийлөгчид нэр дэвшүүлснийг АНУ-ын Ерөнхийлөгч асан Бараг Обама маш ихээр дэмжиж байгаагаа мэдэгджээ. Тэрээр “энэ ажилд хамгийн ихээр тохирох хүн” гээд “Зууван тасалгаанд хүн асуудалтай тулгарахад гаргах шийдвэрээс чинь улс орны бодит байдал, амьдрал дэр чигээрээ хамаарах тэр үед үнэлэлт дүгнэлт хийдэг, зөв шийдвэр гаргахад шаардлагатай зан чанартай хүн хажууд чинь байх хэрэгтэй” гэсэн байна.

Үүнээс өмнө олны дунд нэр алдартай зуу гаруй хар арьст хүн Байденд хандан ил захидал бичиж, дэд Ерөнхийлөгчдөө африк гаралтай эмэгтэй хүнийг нэр дэвшүүлэхийг уриалаад байсан юм. Тэд “ Atlanta Daily World” сайтаар дамжуулан олон нийтэд ил болгосон захидалдаа “Хэрэв та 2020 онд хар арьст эмэгтэй хүнийг сонгохгүй бол та хожигдоно. Бид хоёр гамшгийн багыг нь сонгомооргүй байна, бид танихгүй чөтгөрийн эсрэг таньдаг чөтгөрөө сонгомооргүй байна, яагаад гэвэл бид чөтгөрийн төлөө саналаа өгсөөр залхлаа” гэж бичсэн байжээ.