Ливаны Засгийн газар огцорчээ

Ливаны Эрүүл мэндийн сайд Хамед Хасан нь орон нутгийн LBC сувгаар ярихдаа Засгийн газар нь бүрэн бүрэлдэхүүнээрээ огцорч байгаа тухай мэдэгдсэн байна. Энэ мэдэгдлийн дараагаар Ливаны Батлан хамгаалахын сайд Зейн Акр огцорч байгаагаа мэдэгдэж, Засгийн газрын хэд хэдэн гишүүд ч мөн адил мэдэгдэл хийжээ.

Гэвч эдгээр сайд нар огцорно гэдэг нь Ливаны сайд нарын танхимыг албан ёсоор огцорсон гэсэн үг биш гэдгийг мэргэжилтнүүд онцолсон байна. Одоо Засгийн газар хэрхэх талаар Ерөнхий сайд албан ёсоор мэдэгдэл хийх ёстой юм байна.

Хэрэв Ерөнхий сайд нь Засгийн газраа огцорч байгаа тухай албан ёсоор мэдэгдвэл аймшигт дэлбэрэлтийн дараанаас Бейрут хотод эсэргүүцлийн жагсаал хийж байгаа иргэдийн тавьсан нэг гол шаардлагыг эрх баригчид хүлээж авсан хэрэг болно. Жагсагчид Бейрутын аюулгүй байдлыг ханган ажиллаж чадаагүй Засгийн газрыг огцрохыг шаардсанаас гадна парламентын тарааж, улс даяар эрс шинэчлэл явуулахыг шаардаад байгаа юм.

Жагсагчид баасан гарагийн орой Бейрут дэх дөрвөн ч яамны барилгыг дайран эзлээд байсан. Гэвч арми  тэднийг эзэлсэн байшин барилгаас нь шахан гаргаж чадсан байна. Эдгээр үймээнийг тараах үеэр Ливаны цагдаа, армийн 100 гаруй ажилтан шархдаж, 700 гаруй жагсагчид гэмтэл авчээ.