Японд Оросыг эсэргүүцсэн арга хэмжээ явагджээ

Зөвлөлт улс 1945 онд Японы эзэнт улсад дайн зарласан өдрөөр Японы хэт үндсэрхэг үзэлтнүүд Оросын төлөөлөгчийн газрууд байрладаг Токио, Осака, Саппоро зэрэг хотуудад эсэргүүцлийн арга хэмжээ зохиодог уламжлалтай.

Энэ удаад ч Японы хэт үндсэрхэг үзэлтнүүд Зөвлөлтийг Японд дайн зарласныг эсэргүүцсэн арга хэмжээгээ зохион байгуулсан тухай ТАСС агентлаг мэдээлсэн байна. Арга хэмжээнд оролцогчид нь Халхын голын дайны төгсгөлөөр Зөвлөлт ба Японы эзэнт улсын хооронд 1941 онд байгуулсан харилцан төвийг сахих тухай гэрээг зөрчин, 1945 оны наймдугаар сарын 9-нд Японд дайн зарлан гэнэдүүлсэн дайрч, Курилын арлууд, Өмнөд Сахалин зэрэг Японы газар нутгийг олон улсын хууль дүрмийг зөрчин хууль бусаар булаан авсан гээд булаалгасан нутгаа буцаахыг шаардсан байна. Хэт үндсэрхэг үзэлтнүүд нь “Өмнөд Карафуто  ба Тишима олтриг бүхэлдээ Японы уугуул нутаг” гэсэн бичээс бүхий машиныг Элчин өмнө байрлуулан эсэргүүцлээ илэрхийлжээ. Энд дурдагдсан Өмнөд Карафуто гэдэг нь оросуудын Сахалин гэж нэрлэгддэг арал бол Тишим олтриг гэдгийг Орос нь Курилын арлууд юм байна.

Японы эзэнт улс нь 1941 онд байгуулсан харилцан төвийг сахих тухай гэрээгээ Зөвлөлт ба Германы дайны үеэр ягштал баримталж, Зөвлөлтийг хамгийн хүнд байдалд байсан 1941-1942 онд ч нутаг руу нь дайраагүй атал Зөвлөлт нь итгэлийг эвдэн дайрч, газар нутгийг нь эзэлсэн гэж буруутгадаг аж.

Япон улс дах ОХУ-ын Элчин сайдын яамнаас хэт үндсэрхэг үзэлтнүүдийн арга хэмжээтэй холбоотой тайлбар хийхдээ Япон улс нь харилцан төвийг сахих тухай гэрээгээ зөрчин нацист Германы холбоотон болж, Зөвлөлт улс ба Гитлерийн эсрэг эвслийн холбоотон улсуудын эсрэг дайнд тусалж байсан тул Зөвлөлт нь 1945 оны наймдугаар сарын 9-нд Японы эсрэг дайнд орсон гэдгийг сануулсан байна. Мөн НҮБ-ын Дүрэмд заагдсан Дэлхийн хоёрдугаар дайны үр дүнгийн дагуу Курилын арлуудыг Зөвлөлтөд шилжүүлэн өгсөн гэдгийг заагаад “Ийнхүү эдгээр газар нутаг Оросын  бүрэн эрх мэдэлд байгаа нь олон улсын эрх зүйд суурилсан маргашгүй зүйл” гэсэн байна.