АНУ цэргээ Оросын хилд ойртуулж байна

АНУ нь Европ дах цэргийн хүчээ Оросын хил орчим төвлөрүүлэхийн тулд сэлгэн байрлуулж байгаа тухай Батлан хамгаалахын сайд Марк Эспер мэдэгджээ.

Тэрээр Герман дах Америкийн цэргийн тоог цөөлөх болсон талаар “Fox News” сувагт тайлбар өгөхдөө “Эцсийн бүлэгт бид дорно зүг рүү, Орос хилд ойртуулан цэргээ шилжүүлж байгаа юм” гэжээ. Ингэж Германд байрласан цэргүүдийг Европ дах өөр улсууд руу шилжүүлэн байршуулах болсныг НАТО дах Америкийн гол холбоотнууд “зөв алхам” гэж сайшаасан гэсэн байна. Тэгээд ч Америк нь Герман улсад хангалттай их хэмжээний цэргийн хүч үлдээсэн гэдгийг онцолжээ.

Мөн Эспер нь АНУ нь НАТО-ийн холбоотон улсуудаас батлан хамгаалахын зардлаа ДНБ-ий 2 хувь болгохыг шаардаж байгааг сануулсан байна. Тэрээр “Гишүүн бүр хамгийн багадаа 2 хувийг төлөх ёстой гэдгийг нийтийн өмнө ч тэр, ганцаарчилсан уулзалтын үеэр ч тэр хэлж байсан. Герман гэх мэт улсууд илүү ихийг төлөх ёстой. Орос ба бусад улсыг тогтоон барихын тулд хамтын аюулгүй байдал, хамтын хариуцлагын талаар яригдаж байгаа юм. Хэрэв бид оросуудыг үнэхээр тогтоож дийлэхийг хүсэж байгаа бол хүлээсэн үүргээ биелүүлэх л ёстой” гэжээ.

ОХУ-ын Ерөнхийлөгчийн хэвлэлийн төлөөлөгч Д.Песков нь НАТО-ийн цэргийн дэд бүтэц Оросын хилийн зүг аажмаар шилжин байршиж байгаа нь аюултай бөгөөд зохисгүй зүйлс гэдгийг ОХУ нь ямагт тууштай мэдэгдсээр ирсэн гэж мэдэгдсэн. НАТО-ийн ийм алхмын хариуд Москва нь улсынхаа аюулгүй байдлыг баталгаатай хамгаалахад зайлшгүй шаардлагатай арга хэмжээг авахаас өөр аргагүй болно гэдгийг Песков онцолсон байна.