Бас л оросууд ...

Ливаны нийслэл Бейрутын боомтод болсон аймшигтай дэлбэрэлтийн талаарх мэдээ дэлхийн нийтийн анхаарлын төвд хэвээр байна. Хөдөлмөрийн хамгаалалтын аюулгүй байдлын дүрмийг зөрчсөний улмаас 2750 кг аммиакийн нитрат гэдэг бодис дэлбэрсэн тухай Ливаны Ерөнхий сайд Хассан Дияб мэдэгдсэн. Гэвч буруу болгонд оросуудыг буруутгадаг Өрнөдийн зарим хэвлэлүүдийн болзолт рефлекс нь хөдөлж, энэ дэлбэрэлтэд Оросын оролцоо байгаа талаар бичээд эхэлжээ. “The Daily Beast” сонинд бичсэнээр 2750 кг аммиакийн нитрат ачсан “Rhosus” нэртэй усан онгоц долоон жилийн өмнө буюу 2013 онд Бейрут хотын боомтод орж ирсэн нь энэ эмгэнэлт явдлын эхлэлийг тавьжээ.

Энэхүү “Rhosus” усан онгоц нь Молдавын далбаан дор тээвэр хийдэг байсан ч Кипр аралд байнга оршин суудаг Оросын харьяат Игорь Гречушкин гэгч хүний өмч байж. Баримт бичгүүдэд өгүүлснээр Гречушкин нь 2013 Гүржийн Батуми боомтоос хөдөө аж ахуйн бордоо эсвэл тэсэлгээний ажлын алинд зарцуулагдах нь мэдэгдэхгүй 2750 тонн аммонийн нитрат ачин Мозамбик орохоор хөвж явсан байна. Гэвч учир битүүлэг байдлаар Бейрутын боомтод түр зогсох болж. Ингэж түр зогсох зуур Бейрутын боомтын захиргаа аммонийн нитратыг контрбанд бараа гэж үзээд усан онгоцыг буцаж далайд гарахыг нь хоригложээ. Мөн усан онгоцны багийн гишүүдийг ч эрэг дээр буухыг нь хүртэл хориглож. Боомтод усан онгоц олон хоног зогсоно гэдэг асар их зардал дагуулдаг тул Гречушкин нь удалгүй төлбөрийн чадваргүй болж, усан онгоцоо, багийн гишүүдийнх нь хамт Бейрутын боомтод орхиод сураггүй алга болсон. Багийн гишүүд болох Украйн, Оросын иргэд нь жил гаруй Бейрутын боомтод цалин мөнгөгүй үйлээ үзэж байж нутаг буцсан юм байна. Жилийн дараа боомтын удирдлагууд усан онгоц дээрх аммиакийн нитратыг хурааж, боомтын №12 дугаартай агуулах руу зөөж байршуулсан байна.