Хятадын компаниудыг хязгаарлах арга хэмжээ авч эхэлнэ

АНУ-ын Засгийн газар нь улс орных нь аюулгүй байдалд хохирол учруулж болзошгүй гэгдсэн Хятадын компаниудын эсрэг хязгаарлах арга хэмжээг авч эхэлнэ. Энэ тухай Төрийн нарийн бичгийн дарга Майкл Помпео “Fox News“ сувгийн нэвтрүүлэгт оролцохдоо мэдэгдсэн байна.

Түүнээс TikTok олон нийтийн сүлжээний эсрэг ямар арга хэмжээ авч магадгүй тухай асуусан байна. Хариуд нь Помпео “TikTok, WeChat гэх мэт Хятадын олон компаниуд АНУ-д программ хангамж нийлүүлдэг... тэд өгөгдлүүдийг шууд Хятадын Коммунист нам, төрийн аюулгүй байдлын газар руу дамжуулдаг. Энэ бол гарцаагүй үндэсний аюулгүй байдал, америкчуудын хувийн мэдээллийг хамгаалахтай холбоотой асуудал юм. Ерөнхийлөгч Трамп “Хангалттай” гэж хэлсэн. Одоо бид энэ бүхний учрыг олох болно. Хятадын Коммунист намтай холбоотой программуудаас АНУ-ын аюулгүй байдалд учруулж байгаа төрөл бүрийн аюултай холбоотой арга хэмжээг ойрын өдрүүдэд авна” гэжээ.