Хятадын компаниудыг ялгаварлан гадуурхахаа зогсоохыг уриалжээ

БНХАУ-аас ОХУ-д суугаа Элчин сайд Чжан Ханьхуэй нь Оросын “РИА Новости” агентлагт ярилцлага өгөхдөө АНУ, Их Британи нь Хятадын компаниудын нэр хүндийг унаган, гадуурхаж байгаа нь эдийн засгийн сүрдүүлэг гэж мэдэгдээд Лондон, Вашингтоныг энэ бүхнээ зогсоохыг уриалжээ.

Тэрээр Хятадын компаниудыг ямар ч үнэмшилтэй нотлох баримтгүйгээр зах зээлээс шахан гаргаж байгаа нь зах зээлийн засгийн зарчим, чөлөөт худалдааны дүрмийг зөрчиж байгаа үйлдэл гэдгийг онцлоод “Энэ бол аль нэг компани эсвэл салбарын асуудал бус харин бизнес ба техникийн асуудлыг ямар ч үнээр хамаагүй улс төржүүлж байгаа АНУ, Их Британи гэсэн улсуудын асуудал, энэ бол эдийн засгийн сүрдүүлэг” гэжээ.

Мөн Хятад нь өөрийн компаниудын эрх, ашиг сонирхлыг хамгаалахын тулд шаардлагатай бүх арга хэмжээ авна гэдгийг онцлоод “АНУ-ыг түүхий хүрдийг буцаах гэж оролдохдоо эцсийн дүнд өөрсдийн тавьсан занганд орно” гэж анхааруулсан байна.