Орост корона вирусийн эсрэг вакцин ирэх сарын 15-аас хэрэглэхийг зөвшөөрнө

Оросын Гамалейн нэрэмжит төвд боловсруулсан корона вирусийн эсрэг вакциныг ирэх сарын 10-12-нд албан ёсоор бүртгэлд оруулж, 15-аас иргэд хэрэглэх боломжтой болох тухай “Интерфакс” агентлаг мэдээлжээ.

“Интерфакс”-ын мэдээлж буйгаар вакциныг эхний ээлжид тусгай шинжилгээний төвд өгч шинжлүүлнэ. Дараа энэхүү шинжилгээний төвөөс хийсэн дүгнэлтийг Эрүүл мэндийн яаманд өгч, эрүүл мэндийн дүгнэлт шинжилгээ хийлгэх аж. Үүний дараа л наймдугаар сарын 15-н гэхэд вакциныг иргэдэд эргэлтэд оруулах юм байна.

Үүний өмнө Оросын ШУА-ийн тэргүүн А.Сергеев нь вакциныг бодит үр нөлөөтэй гэдэгт бүрэн дүүрэн итгэлтэй болохын тулд ойролцоогоор хагас жил шаардлагатай байдаг тул 2021 оныг хүртэл хүн амыг олноор л вакцинжуулалгүйгээр, эмч нар гэх мэт өндөр эрсдэлтэй хүмүүст хэрэглэх нь илүү зүйтэй гэж мэдэгдэж байжээ.

Дэлхий дээр ОХУ, АНУ, БНХАУ, Их Британи, Герман зэрэг улс орнуудад корона вирусийн эсрэг боловсруулах 140 гаруй төсөл хэрэгжиж байгаа аж. Эдний дундаа ийнхүү Оросын вакцин хамгийн түрүүнд хүн амын дунд олноор хэрэглэх сертификат авч, хэрэглээнд гарахаар болоод байгаа юм.