Хятад нь Чэнду дах Америкийн Консулын газрыг хааж магадгүй

Хюстон дах Хятадын Консулын газрыг хаахыг шаардсаны хариуд Чэнду дах Америкийн Ерөнхий Консулын газрыг хаахыг шаардаж магадгүй тухай “South China Morning Post” сонин мэдээлжээ.

Америкийг шаардлагаасаа татгалзаагүй тохиолдолд Хятад хариу болгож Ухань дах Консулын газрыг хааж магадгүй гэж яригдаж байсан. Магадгүй ийм ч урчаас Вашингтоноос өрссөн алхам хийж корона вирусийн улмаас түр хаагдаад байсан Ухань дах төлөөлөгчийн газраа сэргээхгүй байхаар шийдээд байсан юм. Гэтэл Хятадын зүгээс тэртээ тэргүй үйл ажиллагаа явуулахгүй хагас жил болсон төлөөлөгчийн газрыг хаах нь бодит нөлөө үзүүлэхгүй гэж үзээд 1985 онд нээгдсэн Чунды дэх төлөөлөгчийн газрыг хаах нь зөв гэж шийдсэн бололтой гэж “South China Morning Post” үзсэн байна.

АНУ нь Хятадыг Хюстон дах төлөөлөгчийн газраа 72 цагийн дотор хаахыг шаардсаны дараа Хятадын ГХЯ-ны төлөөлөгч Ван Вэньбинь “АНУ-ын зүгээс хийж байгаа улс төрийн өдөөн хатгалга нь олон улсын эрх зүй ба олон улсын харилцааны үндсэн зарчмууд, хоёр улсын хооронд байгуулсан консулын гэрээг ноцтой зөрчиж байгаа хэрэг. Хятадын тал шийдвэртэй хариу арга хэмжээ авна” гэж мэдэгдээд байсан юм.

Америк нь Хюстон дах Хятадын төлөөлөгчийн газрыг Америкийн технологийг хулгайлсан, оюутан солилцооны тогтолцоог зүй бусаар ашигласан, төлөөлөгчийн газрын ажилтнууд дипломат ёсонд үл нийцэх үйлдэл гаргасан гэдэг буруутган хаахыг шаардсан ч тодорхой баримт дэлгээгүй юм.

Ийнхүү Хюстон дах Хятадын төлөөлөгчийн газрыг тойрсон дуулилан дөнгөж газар авч эхэлж байтал Сан-Франциско дах төлөөлөгчийн газартай холбоотой шинэ дуулиан эхлэв бололтой.

Америкийн Холбооны мөрдөн байцаах товчоо нь Сан –Франциско дах Хятадын Консулын газрыг БНХАУ-ын армитай холбоотой биологич эрдэмтнийг байрандаа нуун дарагдуулсан гэж буруутгаж байгаа тухай “CNN” мэдээлсэн байна. Мөрдөх товчооны үзэж байгаагаар Зюань Таныгэгч биологич эрдэмтэн өнгөрсөн оны намар Дэвис дэх Калифорнийн их сургуульд судалгаа хийхээр Америкт ирэхдээ Хятадын Ардын чөлөөлөх армитай холбоотой гэдгээ визийн мэдүүлэг дээрээ заагаагүй. Гэтэл Зюань Таны цэргийн дүрэмт хувцастай зургийг Мөрдөх товчоо интернэтээс олж авсан байна. Улмаар зургийн талаар лавлагаа хийхэд биологич эрдэмтэн нь Хятадын Цэргийн нисэх хүчний Цэргийн анагаах ухааны их сургуулийн шинжлэх ухааны ажилтан хийж байсан, Америкт байх хугацаандаа ч тэндээ бүртгэлтэй байсныг тодруулсан аж.

Иймд зургаадугаар сарын 20-нд ХМТ нь Зюань Таныг дуудаж байцаалт авахад Хятадын армитай холбоогүй, их сургуулийн ажилтан учраас дүрэмт хувцас өмсөх ёстой байсан гэсэн тайлбар өгчээ. Гэвч ХМТ нь Зюань Таныамьдарч байсан газар нэгжлэг хийхэд түүнийг Хятадын армитай холбоотой хэвээр гэдгийг нотолсон баримт олсон аж. Улмаар зургаадугаар сарын 26-нд түүнд визийн мэдүүлэг хуурамчаар үйлдсэн гэж ял тулгахад хэдийн зугтаад сураггүй болсон байж. Мөрдөгчид Зюань Таныг Сан-Франциско дах төлөөлөгчийн газар нуугдсан гэж үзэж байгаа юм байна.

Зюань Таны хэргийг мөрдөж байгаа прокурорууд нь Хятадын цэргийнхэн бусад олон эрдэмтдийг Америк руу шинжлэх ухааны ажил хийлгэх нэрийдлээр явуулдаг байсныг тогтоожээ. Үнэндээ тэдгээр эрдэмтэд шинжлэх ухааны ажил гэхээс илүүтэйгээр Хятадын армид шаардлагатай мэдээллийг хулгайлдаг байсан аж. Одоогийн байдлаар Хятадаас ирсэн эрдэмтэд хуулбарлах зорилгоор Америкийн их сургуулиас баримт хулгайлсан нэг хэргийн нотлох баримтыг олоод байгаа юм байна.

БНХАУ нь АНУ-ын Нью-Йорк, Сан-Франциско, Лос-Анжелс, Хюстон, Чикаго гэсэн хотуудад Ерөнхий Консулын газартай бол АНУ нь БНХАУ-ын Гуанчжоу, Шанхай, Шэньяне, Чэнду,Уханьд Консулын газруудтай юм байна.