Генерал Д.Гэрэлийн хүүгийн алтны уурхайн шүүх хурал 7-р сарын 31-нд товлогджээ

Зариг.мн сайтын сэтгүүлч Н.Өнөрцэцэг 2019 оны 11-р сард “Хурандаагийн хүү баяжиж байвал, хүн мал харангадах нь яамай” нэртэй нэвтрүүлгийг Сэлэнгэ аймгийн Баянгол сумаас бэлтгэж хүргэсэн. Тус суманд Нарангийн голоос 27 алхмын зайтай алтны үйл ажиллагаа явуулж буй “Пентетарро” ХХК нь Тагнуулын ерөнхий газрын дарга Д.Гэрэлийн төрсөн хүү Г.Аранзалынх юм. Тус компани нь байгаль орчинд сөргөөр үйл ажиллагаа явуулж Нарангийн гол ширгэсэн талаар сэтгүүлч уг асуудлыг хөндөж сурвалжилсан билээ. Гэтэл Генерал Д.Гэрэл нь миний нэр төрд халдаж байна гэж сэтгүүлчийг шүүхэд өгснөөр хоёр удаа шүүх хурал хойшлов. Сэтгүүлч Н.Өнөрцэцэгийн зүгээс Нарангийн гол ширгэсэн нь үнэн, би хэн нэгнийг гүтгээгүй, тэр алтны уурхай Д.Гэрэлийн хүүгийнх гэдэг нь ч үнэн. Тиймээс газар дээр нь очиж шүүхийн үзлэг хийж өгнө үү хэмээн хүсэлт гаргасан. Уг сэтгүүлчийн хүсэлтийг Сүхбаатар дүүргийн шүүхээс хангаж газар дээр нь үзлэг хийсэн юм. Харин одоо Д.Гэрэлийн нэр хүнд, алдар нэрээ хамгаалж өргөдөл гаргасан шүүх хурал 2020 оны 7-р сарын 31-нд товлогджээ.