АНУ хоёр тэрбум доллараар коронавирусийн эсрэг вакцин захиалжээ

Америкийн “Pfizer” эмийн үйлдвэрлэлийн компани нь корона вирусийн вакцин хийх хоёр тэрбум долларын захиалга авсан тухай “Fox News” мэдээлсэн байна.  Тодруулбал, тус компанийн боловсруулж буй вакциныг Америкийн Хүнсний бүтээгдэхүүн ба эмийн чанарын удирдах газраас зөвшөөрөл авбал 100 сая тун үйлдвэрлэн тараах АНУ-ын Засгийн газар 1,95 тэрбум доллар төлөхөөр гэрээ байгуусан аж. “Pfizer” компани нь Германы “BioNTech” –тэй хамтран вакцин бүтээхээр ажиллаж байгаа аж.

АНУ-ын Засгийн газар нь корона вирусийн тархалтыг зогсоох зорилгоор вакцин боловсруулах ба үйлдвэрлэх явцыг хурдасгах “Operation Warp Speed”нэртэй төлөвлөгөөг хэрэгжүүлэхийн хүрээнд дээр дурдагдсан захиалгыг хийж байгаа юм байна. Америкийн Эрүүл мэнд ба нийгмийн халамжийн яамны нарийн бичгийн дарга Алекс Азар нь “Бодитоор үйлчилдэг, аюулгүй ганц ч болов вакциныг  оны сүүлээр америкчууд хүлээн авна гэх магадлалыг нэмэгдүүлэх үүднээс бид Operation Warp Speed-ийн тусламжтайгаар вакцинуудыг багцлан цуглуулж байгаа юм. Эмнэл зүйн туршилтын амжилтаас шалтгаалаад Pfizer ба BioNTech-ийн бүтээж байгаа вакциныг ойролцоогоор 100 сая тунгаар тараахад өнөөдөр байгуулсан гэрээ туслах болно” гэжээ.

Үүнээс гадна гэрээнд заасан нөхцөлийн дагаа Америкийн Засгийн газар нэмэлт болгож ахин 500 сая тун худалдан авах эрхтэй болж байгаа юм байна.