“Brexit”-ийн санал асуулгад ОХУ нөлөөлсөн гэх баримт олдсонгүй

Их Британийн парламентын Тагнуул ба аюулгүй байдлын хороо нь дэлхийн олон орон, түүний дотор Их Британид болсон сонгуулийн копманит ажлуудад Оросын төрийн зүгээс хөндлөнгөөс оролцсон талаар хийсэн мөрдлөгийн үр дүнгээ олон нийтэд танилцуулжээ.

Тус илтгэлийг бүр өнгөрсөн жилийн аравдугаар сарын 17-нд бэлдэн Ерөнхий сайдын захиргаанд шилжүүлсэн байж. Гэвч Засгийн газар нь илтгэлийг олон нийтэд танилцуулахын өмнө зарим үйл явц болж өнгөрөх ёстой гэсэн шалтгаанаар хэвлэхийг нь хойшлуулаад байсан юм. Тус илтгэлээр Их Британид өнгөрсөн жилүүдэд болсон “Brexit”, Шотландын тусгаарлах тухай гэх мэт санал асуулгад ОХУ нөлөөлсөн гэх дуулиант баримт олныг дэлгэнэ гэж хүлээж байсан ч тийм зүйл огт болсонгүй.

Тухайлбал, тус илтгэлд “Brexit” гэж нэрлэгдсэн бүх нийтийн санал асуулгад ОХУ-ын зүгээс хөндлөнгөөс оролцон нөлөөлсөн гэх нотлох баримт Британийн Засгийн газарт үгүй байгааг дурдсан байна. Гэхдээ Оросыг Их Британид өрнөж байгаа улс төрийн үйл явцад хөндлөнгөөс оролцсон гэж мэдэгдээд, хакеруудын дайралтын цаана ОХУ байгааг нотолбол хариу арга хэмжээ авах ёстой гэжээ. Түүнчлэн Оросын тагнуулын албад “харьцуулшгүй хүчирхэг” байна гэж онцлоод тэдэнтэй тэмцэхийн тулд Их Британид зохих хууль журам баталж, Британийн тагнуулын албадад илүү эрх өгөх хэрэгтэй гэж үзжээ. Улмаар Өрнөдийн орнууд хамтран ажилласан үедээ хамгийн үр дүнтэй байдаг гээд “Оросын бусармаг үйлдлийг үр дүнтэйгээр тогтоон барихын тулд олон улсын хамтын нийгэмлэгийг дэмжлэг шаардлагатай байна” гэж дүгнэжээ.