ХКН-ын бүх гишүүд ба тэдний гэр бүлийг АНУ-д нэвтрэхийг хориглож магадгүй

Ерөнхийлөгч Трампын захиргаа нь Хятадын коммунист намын бүх гишүүд, тэдний гэр бүлийн хүмүүсийг АНУ-д нэвтрэхийг хориглож магадгүй талаар “Bloomberg”, “The New York Times”,“The Wall Street Journal” мэдээлсэн байна. Трампын захиргаа Хятадын эсрэг хориг арга хэмжээгээ зөвхөн өндөр албан тушаалтан намын гишүүдээр хязгаарлахгүй, жирийн гишүүдийг ч хамруулах тухай бодлого хэрэгжүүлж байгаа тул ийм шийдвэр гаргавал хэн ч гайхахгүй биз. Гэхдээ “Reuters” агентлаг нь Ерөнхийлөгч Трамп энэ шийдвэрийн талаар мэдээгүй яваа, түүний захиргааны өндөр албан тушаалтнууд санаачилга гаргаж ийм шийдвэрийг доод шатанд хэлэлцэж байгаа болохоос төрийн тэргүүнд өргөн бариагүй байгаа гэж тайлбарлажээ.

Гэвч тушаал Трампын сонорт хүрч, ёсоор болголоо ч Хятадын коммунист намын бүх гишүүдийг Америк руу нэвтрэхийг хориглоно гэдэг тун ч бэрх асуудал болох тухай “South China Morning Post” бичсэн байна. Одоогоор ХКН яг хэдэн гишүүнтэй нь ч тодорхойгүй, ойролцоогоор Хятадын хүн амын 7 хувь буюу 92 сая хүн гэж багцаалдаг аж. Эдийн засгийн өсөлт, нийгмийн халамжийн бодлого зэргийн нөлөөгөөр ард олны дунд ХКН-ын нэр хүнд өндөр байгаа. Иймд намын бүх гишүүд ба тэдний гэр бүлийн хүмүүсийг Америк руу нэвтрэхийг хоригловол Хятадын 1,4 тэрбум хүний эсрэг хориг арга хэмжээ авсантай адил зүйл болно гэж тус сонин шүүмжилсэн байна. БНХАУ-ын нэр алдартай, хөрөнгө чинээтэй ихэнх хүн намын гишүүн байдаг тул ТРамп ХКН-ын гишүүдийн эсрэг хориг арга хэмжээ авбал “Alibaba”-ийн ЖекМа, “Huawei”-н ЖэньЖэнфэй, цахилгаан машины “BYD”-ын Ван Хунфу, “Xiaomi”-н ЛэйЦзюнь гэх  мэт олон зуун дэлхийд алдартай бизнес эрхлэгчид АНУ руу зорчих боломжгүй болно гэдгийг ч тус сонин анхааруулжээ.