Иллинойст буудалцааны улмаас 12 хүн шархаджээ

Америкийн мужуудад “Black Lives Matter” хөдөлгөөнтэй холбоотой эсэргүүцлийн жагсаал цуглаан үргэлжилсээр байна. Зарим газар жагсагчид ба цагдаа нарын хооронд мөргөлдөөн болж байгаа бол зарим газар нь жагсагчид руу үл мэдэгдэх этгээдүүд гал нээсэн хэрэг гарчээ.

АНУ-ын Иллинойс мужийн Пеориа хот дах голын эрэг дагуух талбайд цугласан хүмүүс рүү үл мэдэгдэх этгээд гал нээсний улмаас 12 хүн шархадсан тухай “Fox News” мэдээлжээ. Орон нутгийн цагаар 4 цагийн үеэр эргийн дагуух талбайд цугласан 200 гаруй хүмүүс рүү гэнэт буудсан аж. Шархадсан хүмүүсээс хоёр нь хүнд байдалд байгаа бол бусдынх нь биеийн байдал тогтвортой байгаа юм байна.

АНУ-ын Ерөнхийлөгч Трамп нь Портлэнд хотын удирдлага нөхцөл байдлыг хяналтаасаа алдсан тул хэв журам сахиулах үүднээс холбооны хүчний байгууллагуудын тусламж болгож явуулсан тухайгаа мэдэгдлээ. Тэрээр Twitter дээрээ “Бид Портлэндэд туслах гэсэн болохоос хорлох гээгүй. Мужийн удирдлага нь анархистууд ба өдөөн хатгагч нарыг олон сарын турш хяналтаасаа алджээ. Тэд боломжийг алдсан. Бид хүмүүсээ болон холбооны өмчөө хамгаалах ёстой” гэжээ.

Америкийн хууль сахиулах холбооны байгууллагууд буюу төв Засгийн газрын мэдлийн хүчний байгууллагууд Портлэнд хотод долоодугаар сарын 4-нд ирснээс хотын шүүхийн байрыг жагсагчдын дайралтаас хамгаалах, эсэргүүцлийн жагсаалын тараах арга хэмжээ авч байгаа юм байна. Орон нутгийн телевизийн сувгийн мэдээлснээр холбооны байгууллагын ажилтнууд таних тэмдэггүй машинаар хотоор явж эсэргүүцлийн жагсаалд оролцогчдыг тайлбаргүйгээр баривчилж байгаа аж.

Холбооны Засгийн газрын, өөрөөр хэлбэл Трампын шийдвэрээр хотод эмх журам тогтоох арга хэмжээ авч байгааг Орегон мужийн болон хотын удирдлагууд эсэргүүцсэн байна. Тухайлбал, Орегон мужийн Ерөнхий прокурор Розенблум нь Портлэнд хотод хэв журам сахиулах арга хэмжээ авч байгаа холбооны албадыг шүүхэд өгчээ. Тэрээр АНУ-ын Холбооны хамгаалалтын алба, Дотоод хэргийн яам, Америкийн тахрын алба, Хил гаалийн алба зэргийг эсэргүүцлийн жагсаалд оролцогчдыг баривчлахаа нэн даруй зогсоох ёстой гэж мэдэгджээ. Хотын мэр Тэд Уиллер нь холбооны хүчний байгууллагын ажилтнуудын хотоос гаргахыг шаардсан байна.

Чикаго хотод Христофор Колумбын хөшөөг хамгаалах үеэр цагдаагийн 18 ажилтан шархадсан тухай “Chicago Sun-Times” мэдээлсэн байна. Америкийн нээсэн хүчний хөшөөний орчим “Колумб бол хулгайч”, “Колумб бол алуурчин” гэсэн уриа хашхирсан олон хүн цуглаж, хөшөөг олсоор оосорлон нураахыг завдсан байна. Цагдаа нар хөшөөг хамгаалах гэхэд цугласан хүмүүс тэдэн рүү янз бүрийн зүйлс шидэлж, цагдаа нар хариуд нь бороохой хэрэглэн дайрч хөшөөнөөс шахан холдуулж чадсан аж.

“Black Lives Matter” хөдөлгөөнийг дэмжигчид нь Христофор Колумбыг Америкийн уугуул иргэдийн хоморголон устгахад оролцсон гэж буруутгаж байгаа юм байна.