Азербайжан улс Армены цөмийн цахилгаан станцыг пуужингаар харвана гэж сүрдүүлжээ

Армен Азербайжаны хилийн дагуух мөргөлдөөн даамжрахыг дагаад хоёр талын амссан хохирол өсөж, сүрдүүлэг ч улам ноцтой болж байна.

Армен нь хилийн мөргөлдөөн эхэлснээс хойш Азербайжаны гурван ч танкийг устгасан гэж мэдэгджээ. Армены Батлан хамгаалахын сайд ШушанСтепанян “Армен-Азербайжаны хилийн зүүн хойд чиглэлд болсон тулааны үеэр Армены цэргийн аж үйлдвэрлэлийн салбарт үйлдвэрлэсэн нисгэгчгүй нисэх аппаратаар дайсны гурван танкийг устгаад байна” гэжээ.

Үүний дараахан Азербайжаны тал нь Армены цөмийн цахилгаан станцад пуужингийн цохилт өгч болзошгүй гэж анхааруулсан байна. Азербайжаны хэвлэл мэдээллийн хэрэгслүүдээр Арменыг Мингечевир усан цахилгаан станцын усан санг дэлбэлж, их хэмжээний газар нутгийн үерт автуулж магадгүй гэж бичиж эхэлсний дараа энэ мэдэгдлийг хийжээ.

Азербайжаны Батлан хамгаалах яамны хэвлэлийн төлөөлөгч ВагифДаргяхлы “Азербайжаны зэвсэгт хүчинд байгаа пуужингийн хамгийн орчин үеийн систем нь Мецаморын цөмийн цахилгаан станцад өндөр нарийвчлалтай цохилт өгөх чадвартай, ийм зүйл болбол Армен сүйрнэ” гэжээ. Үүнээс гадна Азербайжан даяар зэвсэгт хүчнээ дэмжих эх оронч аян явагдаж, 38 мянган хүн Арментай хийж байгаа тулаанд оролцохоор сайн дураар цэрэгт бүртгүүлсэн тухай тус улсын холбогдох албад нь мэдээлсэн байна.

Түүнчлэн Турк улс нь хилийн мөргөлдөөнд Азербайжаныг зүйл бүрээр дэмжинэ гэдгээ бас ахин мэдэгдэв. Энэ удаад Туркийн батлан хамгаалах аж үйлдвэрлэлийн хорооны тэргүүн ИсмиалДемир нь Азербайжанд нисгэгчгүй нисэх аппарат, пуужин, радио электрон тэмцэл хийх тоног төхөөрөмж нийлүүлэх, одоо байгааг нь сайжруулахад туслах бэлэн гэж мэдэгдээд “Турк ба Азербайжаны зүрх хамт цохилж байна. Нэг үндэстэн хоёр улс” гэж мэдэгдсэн байна.

Мөн энэ үеэр курдын “Фират” мэдээллийг агентлаг нь Турк улсыг Азербайжанд тусламж болгож Сирийн хөлсний цэргүүдийг илгээх гэж байгаа тухай мэдээ тараасан байна. Тус агентлаг нь “Турк улс нь Сирийн эрх чөлөөт арми гэж нэрлэгддэг бүлэглэлийн хөлсний цэргүүдийг Азербайжан руу зөөхөөр бэлдэж байна” гэжээ. Турк улс нь Сири дэх өөрийн талыг баримтлагч хөлсний цэргүүдийг Ливи дэх ашиг сонирхлоо хамгаалахын тулд олон мянгаар нь тийш зөөн Үндэсний эв нэгдлийн Засгийн газрын талд байлдуулж байгаа юм.