Колумбид карантин зөрчсөн хүмүүсийг хөнөөж эхэлжээ

Колумбид корона вирусийн халдвар авсан хүний тоо ихсэхийг дагаад зарим газар хөл хорионы дэглэм зөрчсөн хүмүүсийг хороох явдал гарч байгаа тухай “Daily Mail” мэдээлсэн байна. Энэ улсын 32 мужийн 11-д нь хөл хорионы дэглэмийн хяналтыг орон нутгийн дээрмийн зэвсэгт бүлэглэлүүд гартаа авчээ. Эдгээр бүлэглэлүүд хянадаг газар нутагтаа Засгийн газрын тогтоосноос хавьгүй хатуу чанд хөл хорио тогтоох болжээ.

Тухайлбал, зарим мужид дээрмийн бүлэглэлүүд нь хөл хориог өдрийн 17 цагаас эхлүүлж байх тушаал буулгаж. Зарим газар нь  хүнсний дэлгүүр, эмийн санд ажилладгаас бусад хүмүүсийг гэрээсээ гарахыг хатуу хоригложээ. Үүнээс гадна зэвсэглэсэн бүлэглэлүүд нь тосгон суурин хоорондын замын хааж, корона вирусийн халдвар авсан гэж сэжиглэсэн хүмүүсийг өөрсдийн хяналтын бүсээс шахан гаргах болсон байна.

Хянаж байгаа газартаа ямар дэглэм тогтоосныг ухуулах хуудас эсвэл “WhatsApp”-аас мессеж явуулж анхааруулаад, дэглэмийг зөрчсөн хүмүүсийг хөнөөнө гэж сүрдүүлэх болжээ. Сүүлийн хэдэн сарын дотор дээрмийн бүлэглэлүүд хөл хориог нь зөрчсөн есөн хүний аминд хүрсэн байна. Тухайлбал, Колумбын баруун өмнөд нутагт гурван хүнийг хөл хорионы дэглэм зөрчин цэцэрлэгт хүрээлэнгээр зугаалсных нь төлөө буудан хороожээ. Түүнчлэн корона Венесуэлээс ирсэн хоёр цагаачийг засварын газар ажиллаж байхдаа согтууруулах ундаа хэрэглэн карантиныг нөхцөлийг зөрчсөн гэж хороосон байна.

Хүний эрхийг хамгаалах “Human Rights Watch” байгууллагын Төв ба Латин Америк дах салбарын тэргүүн ХосеМигельВивано нь Колумбид үүссэн нөхцөл байдлын талаар ярихдаа зэвсэгт бүлэглэлүүд нь цар тахлаар далимдуулан тус тусын газар илүү хатуу дэглэм тогтоох замаар аюулт өвчнийг тархалтыг зогсоосон нэр зүүж, иргэдээс сайшаал магтаал авах замаар эрх мэдлээ баталгаажуулахыг хүсэж байгаа аж. Нөгөө талаас хөдөө орон нутгийн эмнэлгүүд шаардлагатай тоног төхөөрөмжөөр дутмаг, хүнд өвчилсөн хүмүүст зохих эмчилгээ, асаргаа үзүүлэх боломжгүй тул COVID-19 эрчимтэй тархахаас өөрсдөө ихээхэн эмээж байгаа юм байна.

Колумбид корона вирусийн 165 мянган тохиолдол бүртгэгдэж, халдвар авсан 5814 хүн нас бараад байгаа аж.