Азербайжанд Арментай дайтахыг шаардсан хүмүүс жагсаал хийжээ

Азербайжаны нийслэл Бакуд Арменитай дайтахыг шаардсан хүмүүс жагсаал хийж, парламентын ордон руу дайрч оржээ.

Энэ сарын 15-ны орой Баку хотын төв талбайд арми, зэвсэгт хүчнээ дэмжсэн олон мянган хүн цугларч “Карабах манай нутаг”, “Ерөнхий командлагч цэргийн хүчээ дайчил”, “Арми мандтугай” гэсэн уриа хашхирч жагссан байна. Жагсагчид Арменд нэн даруй дайн зарлахыг шаардаж, парламент энэ талаар байр сууриа илэрхийлэхгүй байгаад дургүйцэн парламентын ордон руу дайрч орсны дараа цагдаа нар болон дотоодын цэрэг тэднийг бороохой хэрэглэн хөөж гаргасан байна. Дайтахыг шаардсан жагсаалд 50 мянга гаруй хүн оролцжээ.

Армен ба Азербайжаны хилийн дагуух Товуз ба Тувш районуудын орчим энэ сарын 12-нд их буу, нисгэгчгүй нисэх аппарат ашигласан ширүүн мөргөлдөөн эхэлж, хоёр талаас олон хүн шархдаж, амиа алдаад байна. Байдал хурцадсаны дараа Турк улс нь Азербайжаныг дэмжин, цэрэг зэвсгийн тусламж үзүүлэхээ мэдэгдсэн бол Армен улс нь Хамтын аюулгүй байдлын гэрээний байгууллагад хандан нэгдсэн байр суурьтай байж дэмжлэг үзүүлэхийг хүсээд байсан юм.

Азербайжаны Ерөнхийлөгч ИльхамАлиев нь Хамтын аюулгүй байдлын гэрээний байгууллага нь Арментай залгаа хилийн дагуу мөргөлдөөнд ямар ч хамааралгүй гэсэн мэдэгдэл хийжээ. Тэрээр “Манайхыг хариу арга хэмжээ авсны дараагаар Армен нь Хамтын аюулгүй байдлын гэрээний байгууллагад хандан тусламж хүссэн байна. Энэ байгууллага энд ямар хамаатай юм бэ? Азербайжан Армены хилийг зөрчөөгүй. Хамтын аюулгүй байдлын гэрээний байгууллагын бүх гишүүд Азербайжаны найз. Гэхдээ мэдээж хэрэг Арменаас бусад нь” гэсэн байна.