Өрнөдийн баячууд “COVID-19” тэмцэхийн тулд татвараа нэмэгдүүлэхийг хүсжээ

“Хүн төрөлхтний төлөөх саятнууд” гэж өөрсдийгөө нэрлэсэн АНУ ба Европын иргэншилтэй нэн баян 80 хүн G20-ийн чуулга уулзалтын өмнө дэлхийн хамгийн хүчирхэг 20 улсын төрийн тэргүүнүүдэд хандан тэднээс авдаг татварыг ихээхэн хэмжээгээр нэн даруй бөгөөд тогтмол нэмэгдүүлэхийг хүссэн байна. “Хүн төрөлхтний төлөөх саятнууд” бүлэг нь улс орнууд ийм замаар корона вирустэй хийх тэмцэл нэн шаардлагатай санхүүгийн эх үүсвэрээ шийдэх боломжтой болно гэж үзэж байгаа аж.

Тус бүлгээс гаргасан мэдэгдэлд “Бид эрчимт эмчилгээний тасагт өвчтөнүүдийг асардаггүй. Бид өвчтөнүүдийг эмнэлэгт хүргэдэг түргэн тусламжийн машинуудыг жолооддоггүй. Бид хүнсний дэлгүүрүүдийн лангууг дүүргэж, айлуудад бараа хүргэж өгдөггүй. Гэхдээ бидэнд мөнгө байна. Маш их мөнгө” гэж өгүүлжээ.

Нэн баян хэсэгт хамаарах хүмүүсээс авдаг татварын хэмжээг тогтмол үндсэн дээр их хэмжээгээр нэмэгдүүлэх хүсэлтэд АНУ, Их Британи, Нидерланд, Дани, Шинэ Зеландын саятнууд гарын үсэг зуржээ.

Тэд үүнээс ч өмнө баячуудаас авдаг татвар нэмэх санаачилгын гаргаж байсан юм. Тухайлбал, энэ оны нэгдүгээр сард Давосын эдийн засгийн чуулга уулзалтын өмнө яг ийм санал гаргаж байсан. Үүнээс бүр өмнө буюу 2016 онд Нью-Йоркийн хамгийн баян 40 гаруй саятнууд мужийнхаа удирдлагад хандан тус мужид амьдардаг нэн баян хүмүүсээс авдаг татвараа нэмэгдүүлэхийг хүсэлт гаргаж байжээ.