Хятад улс Америктай харилцаагаа сайжруулах гурван алхмыг санал болгожээ

БНХАУ-ын Гадаад харилцааны сайд Ван И нь Хятад-Америкийн аналитик төвүүдийн форумд оролцохдоо хоёр улсын харилцааг сайжруулахад арга замын санал болгосон байна. Юуны өмнө харилцан ярилцах бүх сувгуудыг нээх хэрэгтэй гэжээ. Төрийн болон олон нийтийн бүх сувгаар чөлөөтэй харилцан ярилцаж байж худал хуурмагийг арилгах тул Бээжин бүх л сэдвээр чөлөөтэй харилцан ярилцахад бэлэн гэжээ. Хоёрдугаарт, нэн тэргүүнд хэлэлцэх ярилцах ёстой сэдэв, асуудлуудын жагсаалтыг гаргах хэрэгтэй, үүний тулд хэлэлцээрийн ширээний ард сууж эдгээр сэдвүүдийг тодруулах ёстой гэсэн байна. Гуравдугаарт, COVID-19-ийн эсрэг хамтран ажиллах хэрэгтэй, үүний тулд Бээжин тархалтыг зогсоох, оношилгоо болон вакцин боловсруулах талаар хуримтлуулсан туршлагаасаа хуваалцахад бэлэн гэсэн байна.

Гэхдээ хамгийн гол нь АНУ нь БНХАУ-ыг дайснаа болгон зарлаж, бүх л асуудал дээр харлуулах гэж оролдохоо зогсоох нь хоёр улсын харилцааг хэвийн болгоход шаардлагатай гол нөхцөл гэжээ.

АНУ нь Хонконгийн аюулгүй байдлын талаар шинэ хууль баталлаа гэж Хятадын эсрэг хориг арга хэмжээ аваад байсан бол өчигдөр Төвөд рүү гадаадын сэтгүүлчид, албаны хүмүүсийг оруулахгүй байх бодлого хэрэгжүүлсэн гэх Хятадын Засгийн газар, Коммунист намын албаны хүмүүсийн эсрэг визийн хориг тавьсан байна. АНУ-ын Төрийн нарийн бичгийн дарга Майк Помпео нь Бээжинг Төвөд рүү Америкийн дипломатууд, сэтгүүлчид, жуулчдыг аялахад тогтмол саад учруулах болсон атал БНХАУ-ын албаны хүмүүс болон бусад иргэд АНУ –д чөлөөтэй нэвтэрч байна гэжээ.