БНХАУ-ын Тэргүүлэгч Си Жинпинь ОХУ-ын Ерөнхийлөгч Владимир Путинтэй утсаар ярьжээ

ОХУ-ын Ерөнхийлөгч Владимир Путин нь лхагва гарагт Хятадын талаас гаргасан санаачилгын дагуу БНХАУ-ын Тэргүүлэгч СиЖинпинтэй утсаар ярьсан тухай Кремлийн албан ёсны сайт мэдээлсэн байна.

Ярианы үеэр СиЖинпин нь Оросын Ерөнхийлөгчийг Үндсэн хуульд нэмэлт өөрчлөлт оруулах бүх ард түмний санал хураалтыг амжилттай явуулсанд баяр хүргэжээ. Тэрээр энэ алхам нь Оросын төр, нийгэм эдийн засгийн хөгжлийн бэхжүүлэхэд чухал ач холбогдолтой болсон гэж мэдэгдсэн байна. Мөн тусгаар тогтнолоо хамгаалах асуудал дээр харилцан туслалцаж, дотоод хэрэгтээ хөндлөнгөөс оролцохыг хүлээн зөвшөөрөхгүй гэдэг хоёр тал санал нийлсэн байна.

Путин нь Эх орны дайны ялалтын 75 жилийн жагсаалд оролцуулахаар Хятадын армийн нэгж, өндөр албан тушаалтнуудыг явуулсанд талархал илэрхийлжээ. Хоёр орны бүх талын стратегийн хамтын ажиллагааны түвшинд өндөр үнэлгээ өгсөн байна.

Түүнчлэн нүүрсустөрөгч, энхийн цөмийн эрчим хүч, иргэний нисэх онгоц, шинжлэх ухаан техник ба инновацын хамтын ажиллагаагаа цаашид идэвхтэй хөгжүүлэх дээр санал нэг байгаагаа хоёр тал мэдэгдсэн байна. Мөн НҮБ-ын Аюулгүйн зөвлөл, Шанхайн хамтын ажиллагааны байгууллага, БРИКС зэрэг олон улсын байгууллагуудын хүрээнд цаашид нягт хамтран ажиллах сонирхолтой байгааг хоёр тал мэдэгджээ.