АНУ ба БНХАУ-ын цөмийн зэвсгийн нөөцийг харьцуулжээ

БНХАУ-ын Зэвсэглэлийг хянах хэлтсийн захирал Фу Цун нь АНУ-ын цөмийн зэвсгийн тоо Хятадынхаас 20 дахин их гэж мэдэгдсэн байна. Мөн тэрээр АНУ нь энэ зөрүүг улам нэмэгдүүлэхийг санаархаж байна гэжээ. Түүний хэлснээр Вашингтон нь цөмийн зэвсгийн нөөцөө арвижуулахад дараагийн 10 жилд 500 тэрбум, түүний дараагийн 30 жилд 1,2 их наяд долларын хөрөнгө оруулалт хийх гэж байгаа аж. Тэрээр “Хятад улсыг гурван талт хэлэлцээр гэгчдээ оролцуулах хүсэл нь үнэн хэрэг дээрээ цэргийн илт давуу байдал олж авахдаа юунд ч уягдахгүй байх гэсэн шалтаг төдий” гэжээ.

Үүний өмнө Фу Цун нь Америкийг цөмийн зэвсгийн нөөцөө Хятадынхтай адил болгож цөөлсөн тохиолдолд л АНУ ба ОХУ-ын хамтаар зэвсэглэлийг хянах гурван талт хэлэлцээрт оролцоно гэж мэдэгдэж байсан юм.

Ерөнхийлөгч Обама ба Ерөнхийлөгч Медведев нарын 2011 онд гарын үсэг зурж баталгаажуулсан Стратегийн давшилтын зэвсэглэлийг хязгаарлах тухай гурав дах гэрээ 2021 онд дуусах юм. Гэрээг ахин сунгаагүй тохиолдолд хоёр их гүрэн нь тэртээ тэргүй дэлхийд олон дахин сөнөөх боломжтой цөмийн зэвсгийн тоо, хөнөөх чадварыг цаашид ямар ч хяналтгүйгээр нэмэгдүүлж, зэвсэглэлээр хөөцөлдөх шинэ давлагаа эхлэх эрсдэл үүснэ.

ОХУ нь энэхүү гэрээг ямар ч шинэ болзол, нөхцөл дурдалгүйгээр нэн даруй сунгахад бэлэн гэдгээ мэдэгдсэн бол АНУ нь гэрээнд БНХАУ-ыг оролцож, цөмийн зэвсгээ хязгаарлах үүрэг хүлээсэн тохиолдолд сунгах талаар ярилцах боломжтой гэсэн утгатай мэдэгдэл хийжээ.