Хонконгийн цагдаа нар шүүхийг шийдвэргүйгээр нэгжлэг хийх эрхтэй болжээ

Хонконгийн эрх баригчид Үндэсний аюулгүй байдлын тухай шинэ хуулийн дагуу орон нутгийн цагдаа нарт онцгой үед шүүхийн зөвшөөрөлгүйгээр нэгжлэг хийх, эд зүйлсийг хураан авах, интернэт дэх мэдээллийг устгуулах шаардлагыг провайдер компаниудад тавих эрхийг олгосон байна.

Түүнчлэн Хонконгийн эрх баригчид шалгагдаж байгаа иргэдийн хил давахыг хориглох, мөрдөн тагнах, Тайваньд байрладаг улс төрийн бүлэглэлүүдээс авч байгаа мэдээллийг тагнах, мөрдөхийг зөвшөөрөх гэсэн заалтуудыг оруулжээ.

Хятадын ардын төлөөлөгчдийн хурлын байнгын хорооноос баталсан Хонконг дах үндэсний аюулгүй байдлыг хангах тухай хууль нь салан тусгаарлах үзэл, алан хядах ажиллагаа, төрийн эрхийг үгүйсгэх, гадаадын хүчнүүдтэй хуйвалдах зэргийн эсрэг тэмцэхэд чиглэсэн. Хуулийн дагуу бүх насаар нь хорих хүртэл шийтгэл ногдуулж байхаар болсон төдийгүй зарим онцгой хэргийг эх газрын Хятадын газар дээр шийдэж байхаар болсон юм. Өрнөдийн орнууд БНХАУ-ын эрх баригчдын энэ шийдвэрийг “Нэг улс-хоёр систем” гэсэн зарчмыг үгүйсгэж, хүний эрхийг зөрчсөн хэрэг боллоо гэж эрс шүүмжилж байгаа юм.