Жоржиа мужид онц байдал зарлан цэрэг оруулжээ

АНУ-ын Жоржиа мужийн амбан захирагч БрайанКэмпнь мужийн нийслэл Атланта хотод онц байдал зарлаж, хэв журам сахиулахын тулд Үндэсний гвардийн албан хаагчдын дайчлан хотод эргүүл хийх тушаал өгчээ. Одоогоор Атланта хотод Үндэсний гвардийн мянга гаруй цэргийн албан хаагч эргүүл хийх юм байна.

Өнгөрсөн амралтын өдрүүдэд таарсан Тусгаар тогтнолын баярын өдрөөр Атлантад эмх замбараагүй байдал гарч, буудалцаан болсны улмаас 30 гаруй хүн шархдаж гэмтсэнээс тав нь алагдсан байна. Үүний дараанаас амбан захирагч иргэдийн дунд хэв журмыг сахиулахын тулд Үндэсний гвардийг дайчлахаас өөр аргагүй болсон аж.

Гаргасан шийдвэрийнхээ талаар БрайанКэмп “Манай мужийн нийслэлд дэгдсэн эмх замбараагүй байдлыг зогсоож, хэв журмыг сахиулах ёстой. Иргэдийн аюулгүй байдал бидний хувьд нэн тэргүүн ач холбогдолтой тул би онцгой байдал зарласан... Аюултай, сүйрүүлэх санаа бүхий гэмт хэрэгтнүүд эсэргүүцлийн тайван хөдөлгөөнийг эзэрхжээ. Одоо Жоржиагийн гэмгүй иргэд рүү дайрч, буудаад үхэг гээд орхиж байна. Хатуу мэдэгдэл хийж боллоо. Бид Жоржиагийн бүх оршин суугчийн амьдрал, тайван амьдралыг хамгаалах ёстой” гэжээ.

Кэмп нь үүнээс өмнө буюу тавдугаар сарын сүүлээр ЖоржФлойдын үхэлтэй холбоотойгоор Америкийн олон мужуудад дэгдсэн эсэргүүцлийн жагсаал, үймээнийг зогсоохын тулд Үндэсний гвардийн цэргүүдийг хотод оруулж байсан. Энэ дуулианы үеэр Жоржиа мужийн Атлантад хар арьстан РейшардБрукс нь цагдаа нарт эсэргүүцэл үзүүлээд буудуулж амиа алдсаны дараа үймээн гарахад Үндэсний гвардийн цэргүүд хэв журам сахиулж байжээ.

Амралтын өдрүүдэд Америк даяар эмх замбараагүй байдал олон гарсан бөгөөд маш олон хүн, түүний дотор ямар ч гэмгүй хүүхдүүд суманд оногдон амиа алдсан явдал америкчуудыг цочроогоод байна. Тодруулбал, Америк даяар нийт 30 хүн буудуулж амиа алдсаны дараа Вашингтонд 11 настай хүү, Сент-Луист 4 настай хүү, Гуверт 8 настай хүү, Чикагод 7 настай охин буудуулж амиа алдсан байна.