Ираны цөмийн үйлдвэрт Израйл хорлон сүйтгэх ажиллагаа явуулжээ

Хэдхэн хоногийн өмнө Ираны Натанзе дах цөмийн объектод дэлбэрэлт болсон тухай мэдээлэл дэлхийн нийтийн анхаарлыг татаад байсан. Ираны эрх баригчид шатдаг хийн дэлбэрэлтийн улмаас түймэр гарсан ч унтраасан, цацраг идэвхт бодис алдагдаагүй гэдгээс өөр тайлбар хийгээгүй. Гэтэл дэлбэрэлтийг Израйлын тагнуулын алба хийсэн тухай мэдээг “New York Times” нийтэлсэн нь ихээхэн дуулиан тарьжээ.

Тус сонины Ойрх Дорнодын нэгэн улсын тагнуулын албанд ажилладаг эх сурвалж нь Ираны цөмийн объектод Израйлын тусгай албаныхан хүчтэй тэсрэх төхөөрөмж суурилуулан дэлбэлсэн гэж мэдээлсэн байна. Натанзе нь уран баяжуулдаг центрифуг үйлдвэрлэдэг маш нууц газар бөгөөд ихэнх үйлдвэрлэл газар доор явагддаг аж. Дэлбэрэлтийн улмаас газар дээрх хэсэгт ихээхэн хэмжээний хохирол учирсан байна.

Энэ талаар Израйлын холбогдох хүмүүсээс тодруулга авахад тодорхой хариу өгөөгүй ч “цөмийн зэвсэгтэй болсон Иран улсаас ихээхэн аюул заналхийлж байна” гэж мэдэгдсэн байна.

Үүний дараахан Ираны тал хохирлын хэмжээний талаар дэлгэрэнгүй мэдээлэл өгчээ. Ираны Цөмийн эрчим хүчний газрын төлөөлөгч БехрузКамалванди дэлбэрэлт ба дараа гарсан түймрийн улмаас маш нарийн хийц загвартай тусга тоног төхөөрөмж боловсруулах угсрах явц алдагдсан, чухал тоног төхөөрөмж алагдсан. Үүнээс болж Иран нь санхүүгийн хувьд ихээхэн хохирол амссан, төлөвлөгөөт ажил олон сараар хоцрохоор өөр аргагүй болсон хэдий ч тус объект дээрх уран баяжуулах үйл явцад зогсолт, доголдол гараагүй гэсэн байна.

Арваад жилийн өмнө Израйлын тусгай албад уран баяжуулах үйлдвэрийн ажилтнуудын хайнга байдлыг ашиглан тус объектын компьютеруудад тусгайлан вирус суулгаж центрифугуудыг эвдэлж байсан юм.