Амазоны ойд сүүлийн арван жилд байгаагүй олон тооны түймэр дэгдээд байна

Амазоны ойн Бразилын  мэдэлд байдаг хэсэгт сүүлийн арван жилд гарч байгаагүй олон тооны түймэр дэгдсэн тухай “BBC News” мэдээлсэн байна. Сансрын судалгааны үндэсний төвөөс өгсөн мэдээгээр энэ оны зургаадугаар сард буюу хуурай улирал дөнгөж эхлэх үеэр 2,3 мянган түймэр бүртгэгджээ. Энэ бол 2019 онд гарсан түймрийн тооноос 20 хувиар их төдийгүй сүүлийн 13 жилд бүртгэгдсэн хамгийн өндөр тоо болжээ.

Ийм хүнд үед Бразилд корона вирусийн халдвар маш өргөн тархсан явдал байдлыг улам ээдрээтэй болгосон байна. Учир нь, халдвараас болгоомжилсон хүмүүс гэртээ ихэнх цагаа өнгөрөөж, ойн хяналт, ажиглалт орхигдсон. Байдал энэ чигээрээ байвал хуурай улирлын сүүлээр түймрийн тоо өнгөрсөн жилийнхээс хол илүү гарна гэж мэргэжилтнүүд болгоомжилж байгаа аж. 2019 онд  Бразилын мэдэл дэх Амазоны хойд гарсан түймрийн тоо 30,9 мянгад хүрсэн. Тухайд үед энэ байдалд дэлхийн нийтээр анхаарч, Бразилын Ерөнхийлөгч Жаир Болсонаруг түймрийг унтраах яаралтай арга хэмжээ аваагүй тохиолдолд хориг арга хэмжээ авна гэж анхааруулж байсан юм.