Венесуэлийн ЗГ-ыг тэрбум долларын алтаа авах эрхгүй гэж үзжээ

Лондоны дээд шүүхээс Английн төв банканд хадгалагдаж байгаа Венесуэл улсын алтны нөөцийг Мадурогийн ЗГ газарт буцаан өгөхгүй байхаар шийджээ. Шалтгаан нь Их Британийн Засгийн газар Хуайн Гуайдо-г Венесуэлийн Ерөнхийлөгч гэж үзэж байгаа учир банканд байгаа тэрбум гаруй ам.долларын алтан гулдмайг Мадуро захиран зарцуулах эрхгүй гэсэн байна. Шүүгч Найжел Тир “Ямар үндэслэлтэй байснаас үл хамаараад Хатан хааны Засгийн газар нь Гуайдог Венесуэлийн Ерөнхийлөгч гэж ямар ч эргэлзээгүйгээр хүлэн зөвшөөрч байна. Мадурог цаашдаа Венесуэлийн Ерөнхийлөгч гэж хүлээн зөвшөөрөхгүй” гэжээ.

Ингэснээр Венесуэлийн Засгийн газраас Английн төв банканд хадгалуулж байсан 31 тонн алтаа эргүүлэн авч, эдийн засгийн хүнд байдлаас гарахдаа дэмжлэг болгох гэсэн ээлжит оролдлого бүтэлгүйтлээ. Венесуэл нь алтаа хэсэг хэсгээр нь нутаг буцаах гэж удаа дараалан оролдож байгаа юм. Үүний өмнө 2018 онд алтаа авах хүсэлт гаргахад Английн банк 420 сая фунтын алтан гулдмайг “Мадуро төрийн өмчийн алтыг хувьдаа завшиж магадгүй” гэсэн үндэслэлээр буцааж өгөхөөс татгалзсан юм.

Энэ удаад Венесуэл нь 1 тэрбум долларын алтыг буцаан авч худалдаад, олсон мөнгөө корона вирусийн эсрэг эм, эмнэлгийн төхөөрөмж, хүнсний бүтээгдэхүүн авахад зориулахаар тооцож байсан ч бүтэлгүйтэв.

Венесуэлийн талыг баримтлагчид Английн шүүхийн шийдвэрийг хүнд байдалд орсон улс орныг хуулийн нэр барин ил цагаан дээрэмдсэн хэрэг гэж эрс шүүмжилжээ. Сөрөг хүчнээс гаргасан сонгуулийн будилаанаар халхавч хийн Венесуэлийн ард түмний хөрөнгийг буцааж өгөхгүй, хууль ёсоор сонгогдсон Ерөнхийлөгчийг түлхэн унагах улс төрийн сүрдүүлэг явуулж байна гэж үзжээ.

Энэ зуур АНУ-ын нийслэлийг багтаадаг Колумб тойргийн шүүх нь Венесуэл руу шатахуун тээвэрлэн борлуулалт хийдэг Ираны газрын тос зөөгч усан онгоцнуудыг баривчлах хүсэлтийг зөвшөөрсөн байна. Вашингтон хотын прокурор нь хориг арга хэмжээнд өртөөд хямарсан Венесуэл руу мөн адил хориг арга хэмжээнд өртөн хямарсан Иранаас шатахуун, газрын тос тээвэрлэн борлуулалт хийдэг усан онгоцнуудыг эзэмшигч Ираны бизнесмен Махмуд Маданипурийг Ираны Лалын хамгаалагчдын ангитай холбоотой гэж нотолж чаджээ. Ираны зэвсэгт хүчний онцгой тусгай хэсэг гэгддэг Лалын хамгаалагчдыг ангийг АНУ-д алан хядах байгууллага гэж тооцдог тул алан хядах байгууллагатай холбоотой хөрөнгийг нэг даруй баривчлах зөвшөөрлийг олгосон гэж байна.