Хамтран амьдрагчийнхаа хоёр настай хүүг хөнөөсөн Б.Хүлгэнд бүх насаар нь хорих ял оноолоо

Хэнтий аймагт өнгөрсөн оны арванхоёрдугаар сарын 20-ны өдөр хоёр настай, нэг ой гарантай ах дүү нарыг хойд эцэг нь зодсоны улмаас хоёр настай ахынх нь элэг бяцарч нас барсан бол дүүгийнх нь биеийн байдал хүнд, хэвтэн эмчлүүлж байгаа талаар бид Хэнтий аймгаас сурвалжлан хүргэж байсан билээ. 

Тэгвэл шүүгдэгч Б.Хүлгэнд холбогдох Хэнтий аймгийн Прокурорын газраас Эрүүгийн хуулийн тусгай ангийн 10.1 дүгээр зүйлийн 2.7, 2.8 дугаар зүйлд заасан, 11.6-2, 11.7-2.1, 12.1-2.7 дугаар зүйлд тус тус зааснаар зүйлчилж ирүүлсэн хэргийг Хэнтий аймаг дахь сум дундын Эрүүгийн хэргийн анхан шатны шүүх хүлээн авч /2020.06.25/ өдөр шийдвэрлэсэн байна. 

Шүүгчдэгч Б.Хүлгэнийг хүнийг алах гэмт хэргийг хохирогчийг биеэ хамгаалж чадахгүй бага насны хүүхэд болохыг мэдсээр байж гэр бүлийн хүчирхийлэл үйлдсэн буюу Эрүүгийн хуулийн тусгай ангийн 10.1 зүйлийн 2 дахь хэсгийн 2.7, 2.8 дахь заалтад заасан гэмт хэргийг, Хүний эрүүл мэндэд хөнгөн хохирол санаатай учруулсан гэмт хэргийг хоёр хүний эрүүл мэндэд хохирол учруулж, хохирогчийг биеэ хамгаалж чадахгүй, бага насны хүүхэд болохыг мэдсээр байж, гэр бүлийн хүчирхийлэл үйлдсэн буюу Эрүүгийн хуулийн тусгай ангийн 11.6 дугаар зүйлийн 2 дахь хэсэгт заасан, гэр бүлийн хамаарал бүхий харилцаатай хүнийг байнга зодож, харгис хэрцгий харьцаж, догшин авирлаж үйлдсэн гэмт хэргийг хүүхдийн эсрэг үйлдсэн буюу  Б.Хүлгэнд Эрүүгийн хуулийн тусгай ангийн 10.1 зүйлийн 2 дахь хэсгийн 2.7, 2.8 дахь заалтад зааснаар бүх насаар нь хорих ялаар, 11.6 дугаар зүйлийн 2 дахь хэсэгт зааснаар 720 цагийн хугацаагаар нийтэд тустай ажил хийлгэх ялаар, 11.7 дугаар зүйлийн 2 дахь хэсгийн 2.1 дэх заалтад зааснаар 1 жилийн хугацаагаар хорих ялаар, 12.1 дүгээр зүйлийн 2 дахь хэсгийн 2.7 дэх заалтад зааснаар 5 жилийн хугацаагаар хорих ялаар тус тус шийтгэх ялыг оногдуулж, Шүүгдэгч Б.Хүлгэнд ЭХЕА-ын 6.8 дугаар зүйлд зааснаар дээрх ялуудыг нэмж нэгтгэн бүх насаар нь хорих ялыг оногдуулж, уг ялыг хаалттай хорих ангид эдлүүлэхээр шийдвэрлэсэн байна.