Европын орнуудыг Хятадаас гаалийн үзлэгийн төхөөрөмж авахгүй байхыг уриалжээ

АНУ-ын эрх баригчид Европын орнуудын удирдлагуудад хандан Хятад үйлдвэрлэсэн гаалийн үзлийн тусгай төхөөрөмж худалдан авахаас татгалзуулахаар ятгаж байгаа тухай “Wall Street Journal” мэдээлсэн байна.

Тодруулбал, техникийн тусгай үзлэгийн тоног төхөөрөмж үйлдвэрлэдэг Хятадын “Nuctech Co” компанийн тоног төхөөрөмж худалдан авч Европын орнуудын гааль дээр байршуулах нь Өрнөдийн орнуудын аюулгүй байдал ба бизнест аюул учруулна гэж АНУ-ын удирдлага үзэж байгаа юм байна.

Хятадын “Nuctech” компани нь нисэх, төмөр зам ба усан онгоцны буудлууд, хилийн шалган нэвтрүүлэх цэгүүд дээр байршуулсан ачаа бараанд үзлэг хийх тусгай тоног төхөөрөмж үйлдвэрлэдэг. АНУ-ын албаны хүмүүс нь Хятадын компанийн төхөөрөмж нь бизнесийн болон хувийн мэдээллийг Хятадын эрх баригчдад нууцаар дамжуулдаг байж болзошгүй гэж сэжиглэж байгаа аж. Түүнчлэн ачаа тээвэр ба зорчигч тээврийн буудлуудыг ийм төхөөрөмжөөр тоноглосон тохиолдолд НАТО-ийн гишүүн орнуудын хооронд цэргийн ачаа тээврийн аюулгүй байдал алдагдаж болзошгүй гэж болгоомжилж байгаа юм байна.

“Nuctech” компани нь Европын арав гаруй улсын гааль дээр тоног төхөөрөмжөө байршуулахаар тендерт өрсөлдөж байгаа аж. Хамгийн сүүлд гэхэд Финланд улс нь Америкийн дипломатчидын ятгалга, анхааруулгыг үл тоон Оростой залгаа хил дээрээ тус компанийн ачааны сканерыг байршуулжээ.

Америкийн эрх баригчдын анхааруулгад хятадын “Nuctech” компани нь зах зээлийн үнээс хямдаар тоног төхөөрөмжөө санал болгож байгаа тул АНУ ба Их Британийн өрсөлдөгчдөө ядах зүйлгүй шахаж байгаа юм байна.

Харин “Nuctech” компани нь АНУ-ын зүгээс өөрийнх нь эсрэг хориг хүчин чармайлт гаргаж байгааг мэдэхгүй гээд төрөөс дэмжлэг авалгүй үйл ажиллагаа явуулдаг хувийн компани “Манай төхөөрөмжүүдийн авч байгаа бүх өгөгдөл нь биднийх ч биш, Европын холбооны гишүүн орнуудын төрийнх ч биш, ялангуяа Хятадын Засгийн газрынх биш бөгөөд зөвхөн манай үйлчлүүлэгчдийн өмч” гэжээ.