Нийслэлд сонгуулийн 127 хэсэгт хяналтын тооллого хийж байна

УИХ-ын 2020 оны ээлжит сонгуульд нэр дэвшсэн зарим нам, эвсэл, бие даагчдын шаардлага, Монгол Улсын Ерөнхийлөгчөөс СЕХ-нд явуулсан албан бичгийн дагуу СЕХ болон Нийслэлийн сонгуулийн хороо сонгуулийн зарим хэсгийн хороонд саналын хуудсыг хянан дахин тоолж байна. 

Дахин тоолллого энэ сарын 27-28 буюу өчигдөр, өнөөдөр 2 өдөр явагдаж байна.Нийслэл нийтдээ УИХ-ын сонгуулийн 9 тойргийн хороо, 451 хэсгийн хороотой. Үүнээс УИХ-ын сонгуулийн санал авах 6 дугаар сарын 24-ны өдөр 102 хэсгийн хороонд хяналтын тооллого хийсэн. Энэ нь нийт хэсгийн хороодын 23 хувь болсон. Харин 6 дугаар сарын 27-28 буюу өчигдөр, өнөөдөр нийслэлийн сонгуулийн 127 хэсгийн хороонд хяналтын тооллогыг хийж байна. Ингэснээр нийт хэсгийн хороодын 50 хувьд нь хяналтын тооллого хийгдэж буй юм.