ЗГ: Хүнд бүс нутагт амьдарч буй хүүхдүүдийг яаралтай тусгай үүргийн онгоцоор авчрахаар боллоо

Өнөөдөр олон улсын хүүхдийн эрхийг хамгаалах өдөр. Энэ өдрийг тохиолдуулан Засгийн газрын өнөөдрийн хуралдаанаар монголын хүүхэд багачуудтай холбоотой хоёр чухал шийдвэр гаргасныг танилцуулъя.

Нэгдүгээрт, 1978 онд Олон Улсын “Найрамдал” зусланг байгуулж байсан түүхтэй. Энэ зусланд дэлхийн олон орны хүүхдүүд амарч, Монгол Улсын зан заншил түүхийг улс орондоо сурталчилж байсан. Монгол Улсын Ерөнхий сайдын өгсөн үүрэг чиглэлийн дагуу “Найрамдал-2” зусланг Хөвсгөл нуурын байгалийн цогцолбор газарт байгуулахаар боллоо.

 Шинээр байгуулагдах зуслан маань нэг дор 500 хүүхдийг хүлээн авах хүчин чадалтай. Дэлхийн олон орны хүүхдүүдийг амруулж, монголын соёл уламжлалыг сурталчлахад томоохон түлхэц болно. Зусланг байгуулах газрын асуудлыг Байгаль орчны сайдад, уг зусланг барих төсвийг 2021 оны төсөвт суулгахыг Сангийн сайдад үүрэг болголоо.

Хоёрдугаарт, коронавирусийн халдвар гарсны улмаас гадаад улс орнуудад байгаа хүүхдүүдээ татан авах ажлыг Засгийн газар хийж байгаа. Энэтхэг Улсын Гоман дацанд манай улсын 317 ламхай суралцаж байгаа. Тэдний 219 нь эх орондоо эргэн ирэх хүсэлтээ гаргасан. Тэдгээр хүүхдийг нэн даруй эх оронд нь татан авчирч, тусгаарлалтад байх хугацаанд гарах зардлыг хүүхэд хамгааллын зардлаас гаргахыг үүрэг болголоо.

 Хүүхдүүдийг буцаан авчрах нислэгийн зардлыг хүүхдүүдийн эцэг эх, хандив тусламжийн байгууллага, Энэтхэгийн Гоман дацангаас гаргуулна. Энэ ажил нь хүүхдийн эрхийг хамгаалах томоохон ажил болно  хэмээн бид үзэж байна.