Сүүлийн хоёр жил, 4 сарын хугацаанд гэмт хэргийн улмаас 248 хүүхэд амь насаа алджээ

Насанд хүрээгүй хүүхэд гэмт хэргийн хохирогч болж, эрүүл мэнд, амь насаараа хохирох тохиолдол гарсаар байна. Гэмт хэргийн улмаас хүүхэд хохирсон, амиа алдсан хэргийн тоон мэдээллийг хүргэе. 

2018 онд 1688 хүүхэд гэмт хэргийн улмас хохирсноос, 88 хүүхэд амиа алдсаны 45 нь авто замын ослоор, 27 нь усанд, хүнийг алах гэмт хэгийн улмаас гурав, мориноос унах, гадны биетэд цохиулах зэрэг шалтгаанаар 13 хүүхэд амь насаа алдсан байна.
2019 онд 1598 хүүхэд гэмт хэргийн улмаас хохирсноос 111 нь амь насаа алдсан байна. Зам тээврийн ослын улмаас 49, усанд осолдож долоо, хүнийг алах гэмт хэргийн улмаас дөрөв, өндрөөс унах, мориноос унах, гадны биетийн улмаас зэрэг шалтгаанаар 44 хүүхэд амь насаа алджээ.
Тэгвэл 2020 оны эхний дөрвөн сарын байдлаар 398 хүүхэд гэмт хэргийн хохирогч болж, 49 хүүхэд амь насаа алджээ. Тэдний долоо нь хүнийг алах гэмт хэргийн улмаас, усанд зургаа, авто ослоор найм, бусад шалтгаанаар 28 хүүхэд амь насаа алдсан баримт байна.
Дээрх тоон мэдээллээс үзвэл сүүлийн хоёр жил, дөрвөн сарын хугацаанд 248 хүүхэд гэмт хэргийн улмаас амь насаа алдсан байна. ЕБС-ийн нэг ангид 40 сурагч суралцдаг гэж үзвэл харамсалтайгаар амиа алдсан хүүхдүүд зургаан ангийн сурагчтай тэнцэх хэмжээнд хүрсэн байна.
Гэмт хэргээс урьдчилан сэргийлэх чиглэлээр цагдаагийн байгууллага ажилладаг. Гэтэл хүүхдийг гэмт хэргээс урьдчилан сэргийлэх зорилготой хүүхдийн тасаг маш хангалтгүй орон тоотой. 20 мянга орчим хүүхдийн дунд нэг алба хаагч хуваарилагддаг. Эндээс хүүхдийг гэмт хэргээс урьдчилан сэргийлэх ажил хангалттай хийгдэх боломжгүй нь харагдаж байгаа юм.
Хүний амьдралын зорилго шалтгаан болсон хүүхдүүдээ гэмт хэргийн хохирогч болохоос урьдчилан сэргийлэх нэг алхам нь хүүхдийг гэмт хэргээс сэргийлэх цагдаагийн алба хаагчдын тоог нэмэгдүүлэх шаардлагатай байгаа нь харагдаж байна. Энэ орон тоог нэмэх эрх хэмжээ нь МУ-ын Засгийн газарт бий.